استولتنبرگ: ناتو اوکراین ده حربی کوچ جایلشتیرمه‌یدی
ناتو باش کاتبی ینس استولتنبرگ، بو تشکیلات نینگ اوکراین ده حربی کوچ جایلشتیریش اوچون هېچ ریجه‌سی یوق‌لیگینی بیلدیردی.
استولتنبرگ ۲۱ اپریل، یک‌شنبه کونی، شمالی اتلانتیک کېلیشوو تشکیلات (ناتو) اعضالری کی‌یف ده‌گی ایلچیخانه‌لریده حربی خذمتچیلرینی، اوکراین رسمی‌لری گه مصلحت بیریش مقصدیده جایلشتیرگنلرینی اېتگن.
ام‌اس‌ان‌بی خبری ترماغی نینگ گزارشی اساسیده، ناتو نینگ اوشبو ییریک رسمی‌سی امریکا نینگ اوکراین گه ینگی یاردم پاکت‌لری تصدیقلنیش طرحی کېچیکتیریلیشی، اوروش میدانی گه کی‌یف اوچون منفی عاقبتی بولگنینی معلوم قیلگن.
اونینگ کوپه‌یتیریشیچه: «اوشبو حربی یاردم پاکتی آی‌لر جنجل‌دن سۉنگ نهایت تصدیقلندی، اوکراین گه اونی یوباریش کېچ بولمه‌گن بولسه ده، لېکن نیچه آی‌لیک توخته‌تیلیشی اوروش میدانیده اوشبو مملکت اوچون یامان عاقبت گه سبب بولگن.»
اوکراین حربی کوچلری سۉنگی تورت آی ایچیده جهاز یېتیشمسلیگی بیلن روپه‌ره بولگن، عین‌حالده روسیه کوچلری نینگ اختیاری ده قورال-یراغ کوپ دیه تاکیدله‌گن، استولتنبرگ.
بوندن آلدین فرانسه جمهور باشلیغی امانوئل مکرون، اوکراین گه ناتو کوچلری یوباریلیشینی رد قیلمسلیگینی اېتگن اېدی.
بو سۉزلر عین‌حالده بیان بولماقده که روسیه جمهور باشلیغی ولادیمیر پوتین غرب مملکتلری اینقسه امریکا گه، روسیه بیلن ناتو تشکیلاتی نینگ مستقیم توقنشووی گه یالغیز بیر قدم قالگنیدن آگاه‌لنتیرگن اېدی.
پوتین نینگ ایشانچی گه کوره، روسیه و ناتو نینگ توقنشووی اوچینچی دنیا اوروشی گه سبب بولیب و هېچ تامان بونگه طرفدار اېمس دیر.
