اسپانیا تشقی ایشلر وزیرلیگی بامیان ده اوچ فقراسی نینگ اۉلگن‌لیگینی تصدیقله‌دی
۸صبح، کابل: اسپانیا تشقی ایشلر وزیرلیگی بامیان ولایتیده قوراللی هجوم عاقبتیده اوشبو مملکت نینگ اوچ فقراسی اۉلیب و بیر فقراسی یره‌لنگنینی تصدیقله‌گن.
اسپانیا باش وزیری پدرو سانچز ۲۸ ثور، جمعه دن شنبه گه اوتر کیچه ایکس صحیفه‌سیده، بو واقعه قربان‌لری «سیاحت‌چیلر» اېکن دیب یازگن.
اونینگ کوپه‌یتیریشیچه: «افغانستانده اسپانیالیک سیاح‌لر نینگ اۉلدیریلگنیدن حیرت ده قالدیم. مین احوالنی یقیندن کوزه ته‌من. فوق‌العاده قنسول واحدی برچه یاردملرنی کورسه‌تیش اوچون تلاش قیلماقده. مین واقعه قربان‌لر نینگ عایله اعضالری و دوست‌لری گه همدردلیک بیلدیره‌من.»
عین‌حالده، فرانسه آژانسی اۉز منبعلریدن نقل قیلیب یازیشیچه، اوشبو واقعه طفیلی یره‌لنگن اوچ کیشی ناروی، استرالیا و لیتوانیا فقرالری دیر.
بامیان ولایتیده چیت‌ایللیک سیاح‌لر گه هجوم بیرقطار مملکتلر و خارجی عملدارلر نینگ قتیق مناسبتی بیلن دوچ بولگن.
افغانستان اوچون اروپا اتفاقی و امریکا وکیللری علیحده بیانیه‌لریده بو هجوم نی قاره‌لشگن.
افغانستان اوچون امریکا نینگ مخصوص وکیلی تام وست، زوره‌وانلیک ییچیم یول اېمس‌لیگینی بیلدیرگن.
افغانستان اوچون امریکا ایلچیخانه‌سی نینگ کارداری کرن دیکر هم اۉتگن کون بامیان ده اۉیوشتیریلگن هجومنی «قورقاق‌لیک» دیب و قاره له‌گن.
عین‌حالده، اروپا اتفاقی اۉز بیانیه‌سیده اوشبو واقعه طفیلی اولیب و یره‌لنگنلر نینگ عایله اعضالری بیلن همدردلیک بیلدیرگن.
افغانستان اوچون اروپا اتفاقی اداره‌سی نینگ کارداری رافایلا، بامیان ده چیت‌ایللیک فقرالر گه هجومنی ناجوان‌مردلیک دیب اته‌گن.
طالبان ایچکی ایشلر وزیرلیگی، بامیان ولایتی مرکزی ده اۉیوشتیریلگن قوراللی هجومده چیت‌ایللیک اوچ فقرا و افغانستان‌لیک بیر فقرا هلاک بولگنینی تصدیقله‌گن.
بو هجوم مسوولیتینی حاضرگچه هېچ کیم یا ده گروه تن آلمه‌گن.
ایتیش کېره‌ک که بامیان ده اۉتگن کونگی اوق آتیش، افغانستانده طالبان ایکّینچی مرته قدرت نی آلگنیدن سۉنگ چیت‌ایللیک فقرالر گه اېنگ قانلی هجوم دیېلگن.
