بدخشان امنیه قوماندانی اۉغلی مخدرماده‌نی قاچاق قیلگنلیک عیبی بیلن اوشلب آلیندی
۸صبح، بدخشان: بدخشانده محلی منبعلرنینگ ایتیشیچه، طالبان امنیه قوماندانی نینگ اۉغلی و بو گروه نینگ باشقه اوچ عضوی مخدر ماده نینگ «چرس» تورینی قاچاق و ساتگنلیکده عیبله‌نیب اوشلب آلینگن.
موضوعدن خبردار بیر منبع ۳- جدی یک‌شنبه کونی ۸صبح کونده‌لیگیگه بو کیشیلر طالبان مخدر ماده گه قرشی کوره‌ش اداره‌سی عضوی ثواب‌الدین، جرم اولسواللیگی پلان و اوپراسیون مدیری و بدخشان اوچون طالبلر امنیه قوماندانی قاری واصل نینگ اۉغلی محمد یاسرلر اېکینی بیلدیردی.
اوشبو شخصلر تخار ولایتی ینگی قلعه اولسواللیگی اطرافیگه یقین تاجیکستان چېگره‌سی حدودیده رنجر رسوملی موتردن فایدله‌نیب ۵۰ کیلیو گرام چرسنی انتقال بېره دیگن پیتده اوشلب آلینگنلر دېدی منبع.
شونینگدېک منبع نینگ ایتیشیچه، بدخشان اوچون طالبلر امنیه قوماندانلیگی رنجریدن فایده‌له‌نیب مخدر ماده‌نی قاچاق اېته دېگنلر یانیدن ایکّی تور قورال اسلحه (ام – ۴۰) بیرته «سنایپر» و امریکالیک بیر توفانچه قۉلگه کیریتیلگن.
بوندن تشقری تخار ولایتی ینگی قلعه اولسواللیگیده طالبلر ایچیده‌گی بیر منبع نینگ بو خبرنی تصدیقلب 8صبح کونده‌لیگیگه ایتیشیچه، مذکور شخصلر ۲- جدی شنبه کېچه تالقان شهری نینگ یشاووچیسی بۉلمیش طالبان نینگ محلی عضوی بۉلگن قاچاقچی حبیب‌الرحمن گه ساته دېگنده اوشلب آلینگنلر.
اوشبو منبع نینگ سۉزلریگه کۉره، ینگی قلعه اولسواللیگیده طالبان رنجر، حربی جهازلر و قۉلگه کیریتیلگن مخدر ماده‌نی بدخشانده‌گی طالبان گروهی امنیه قوماندانیگه تاپشیرمه‌گنلر، اما بدخشان اوچون طالبان امنیه قوماندانی اۉغلی تخارده بو گروه امنیه قوماندانی مولوی ضیاء الحق حامد نینگ بویروغی بیلن قیته‌دن او ولایتگه یوباریلگن و قالگن اوچ نفر اېسه هنوز تخارده طالبان نظارتیده سقله‌نیشی ایتیله‌دی.
طالبان هنوزگچه بو باره‌ده رسمی بیر نرسه دېمه‌گن.
بدخشان مملکت شمال شرقیده مخدر ماده نینگ یېریک منبعلریدن تانیلگن. طالبان نینگ ایکّی ییل حاکمیتیده بو ولایتده‌گی طالبان گروهی نینگ محلی قوماندانلری اینیقسه تخار ولایتی نینگ ماهواری کوکچه حدودیده تاجیکستان بیلن چېگره‌داش بولگنی اوچون مخدر ماده‌نی ساتیش و قاچاق اېتیشدن یخشی پول قۉلگه کېلتیره‌دیلر.
