طالبان مدافعه وزیری روسیه‌گه کېتگن
۸صبح، کابل: طالبان بو گروه مدافعه وزیری محمد یعقوب مجاهدنینگ خوفسیزلیک ییغیلیشیده اشتراک اېتیش اوچون روسیه‌گه سفر قیلگنی حقیده خبر بېرگن.
طالبان مدافعه وزیرلیگی، سه‌شنبه کونی، ۵ جوزا، ایکس صحیفه‌سیده یازیشیچه، اوشبو کنفراس منطقه و دنیانینگ بیر قطار دولتلری خوفسیزلیک و مدافعه عملدارلری اشتراکیده اۉتکزیله‌دی.
طالبان قۉشیمچه قیلیشیچه، منطقوی خوفسیزلیک، عمومی خوفسیزلیک معمالری و اۉز-ارا همکارلیک کنفراس‌نینگ بحث موضوعلریدن بۉله‌دی.
روسیه دنیاده طالبان گروهینی افغانستاندهگی قانونی حکومت صفتیده تن آله‌دیگن یگانه دولت حسابلنه‌دی.
شونگه قره‌مه‌ی، مسکو دایما طالبان نظارتی آستیده‌گی افغانستانده ترورچی گروهلر فعالیتیدن خواطر بیلدیریب کېلگن.
روسیه خوفسیزلیک کېنگشی کاتبی سرگی شویگو ۲۴ ثور کونی شانگهای همکارلیک تشکیلاتیگه اعضا دولتلر خوفسیزلیک اداره‌لری کاتبلری ییغیلیشیده افغانستانده ۲۰ دن آرتیق تورلی گروهلرگه علاقه‌دار تخمیناً ۱۸ مینگدن ۲۳ مینگ‌گچه جنگچی فعالیت یوریته‌یاتگنینی اعلان قیلگن اېدی.
او قۉشیمچه قیلیشیچه، تروریزم و مخدره مادّه‌لر قاچاقی‌دن کېلیب چیقه‌یاتگن تهدیدلر افغانستان حدودیدن هنوز منطقه‌ده‌گی اساسی خوفسیزلیک تشویشلریدن بیری بۉلیب قالماقده.
روسیه خوفسیزلیک کېنگشی کاتبی تأکیدله‌شیچه، اوشبو تهدیدلرنی نظارت قیلیش اوچون اَیریم چاره‌لر کۉریلگن بۉلسه-ده، بو گروهلرنینگ بیر قِسمی هلی هم افغانستان حدودیده طالبان خوفسیزلیک اداره‌لری تۉلیق نظارتیدن تشقریده فعالیت یوریتماقده.
