طالبان نینگ نمایش‌کارانه لایحه‌لری؛ اهالی چنگ و ترانسپورت تیربندلیگیدن شکایت قیلماقده
ایلیا
کابل نینگ بیر قطار اهالیسی شهر بۉیلب تورلی حدودلرده یۉللرنی قَیته قوریش ایشلری چۉزیلیب کېتگنیدن شکایت قیلماقده. اولرنینگ ایتیشیچه، بو لایحه‌لرنینگ دوام اېتیب قالیشی آدملرنینگ کونده‌لیک حرکتلنیشیده جدّی معمالرنی یوزه‌گه کېلتیرگن. اهالی نینگ قۉشیمچه قیلیشیچه، تیربندلیکلر سبب ایلگری بېش دقیقه‌ده باسیب اۉتیله‌دیگن یۉللر اېندی یریم ساعت یاکه اوندن هم کۉپراق وقت طلب قیلماقده.
اهالی ۸صبح گزېته‌سی بیلن صحبتده مقابل یۉللردن فایده‌لنیش هم یۉل حالتی یامانلیگی، قوروق موسمده چنگ-تۉزان، یامغیرلی موسمده اېسه لای طفیلی جدّی قیینچیلیکلر بیلن کېچه‌یاتگنینی تأکیدله‌یدی. اولر طالباندن یۉل قوریلیشی لایحه‌لری باشلنگنده ایشنی تېز، ترتیبلی و اوزلوکسیز آلیب باریشنی همده لایحه‌لرنینگ چۉزیلیشیگه سبب بۉله‌دیگن کېره‌کسیز تۉختشلرنینگ آلدینی آلیشنی سۉره‌شه‌دی.
کابل نینگ دوغ‌آباد حدودی اهالیسی منصور یۉل ترمیملش ایشلری نینگ سستلیگیدن خواطر بیلدیره‌دی. اونینگ ایتیشیچه، بو سستلیک اولرنینگ حدودیده حرکتلنیش، تیربندلیک و اطراف-محیط افلاسلنیشی کبی کۉپلب معمالرنی کېلتیریب چیقرگن. اونینگ فکریچه، بو حالت نه‌فقط اهالی نینگ ناراضیلیگینی آشیرگن، بلکه ساغلیق و اطراف-محیط معمالرنی هم کوچه‌یتیرگن.
منصور شونده‌ی دېیدی: «دوغ‌آباد تۉرت یۉللیگیدن گلباغ‌گچه بۉلگن یۉلنی قَیته قوریش اوچون انچه وقتدن بېری کاولب قۉییشگن. مسووللر قوریلیش ایشلرینی باشلشگن، اما حاضرگچه اونی یکونلشگه یېترلی اعتبار بېریلمه‌گن. بیز هر کونی شو یۉلدن یوره‌میز و چنگ-تۉزان همده هوا افلاسلنیشی بیلن یوزلشه‌میز.»
کابل اهالیسی طالباندن توگللنمه‌گن لایحه‌لرنی و یریم تیار یۉللرنی تېزلشتیریشنی سۉره‌یدی، شونده آدملر تیربندلیک، چنگ-تۉزان و کېچیکیشلردن خلاص بۉلیشی ممکن.
منصور قۉشیمچه قیله‌دی: «طالباندن بو یۉل ایشیگه جدّی اعتبار قره‌تیب، اونی امکان قدَر تېز یکونلشنی سۉره‌یمیز. بو یۉلدن اۉتگنده تیربندلیک، چنگ-تۉزان و شاوقین طفیلی فقرالر جوده کۉپ قیینچیلیکلرگه دوچ کېلماقده. تکسی هیداوچیلری هم یۉل نینگ یامانلیگی و کېچیکیشلر سبب کۉپلب معمالرگه دوچ کېلماقده. اېنگ کتّه ضرر اېسه اوی و ایش جایلری شو یۉل بۉییده جایلشگن عایله‌لر و دوکاندارلرگه تېگماقده. کاولش ایشلری نتیجه‌سیده‌گی چنگ اَیریم اهالیده ساغلیق معمالرینی کېلتیریب چیقرگن، حتا بعضیلری کوچلی هوا افلاسلنیشی سبب طبی مرکزلرگه مراجعت قیلیشگه مجبور بۉلگن. امید قیله‌میز، طالبان خلق آوازینی اېشیته‌دی و بو لایحه‌نی تېزراق یکونله‌یدی.»
کابل نینگ ۱۵-ناحیه‌سی اهالیسی شاهپورنینگ ایتیشیچه، اَیریم یۉللر قوریلیشی طالبان تامانیدن شرطنامه کمپنیلر اوستیدن یېترلی نظارت یۉقلیگی سبب سستلشگن. اونینگ فکریچه، اگر نظارت کوچه‌یتیریلسه، لایحه‌لر بېلگیلنگن مدتده یکونلنه‌دی و آدملر کمراق معماگه دوچ کېله‌دی.
اونینگ ایتیشیچه، سر تپه کارته‌نودن نساجی و ده‌خدای‌داد تامانگه چۉزیلگن یۉل هم سېکین قوریله‌یاتگن لایحه‌لردن بیری بۉلیب، بو حدود اهالیسی اوچون کۉپلب معمالر توغدیرماقده. چنگ-تۉزان، تیربندلیک و یۉل حالتیگه اعتبار بېریلمسلیگی آدملر نینگ کونده‌لیک حیاتیگه سلبی تأثیر کۉرسه‌تگن.
شاهپور شونده‌ی دېیدی: «بو یۉل اوزاق وقتدن بېری قوریلیشده، اما ایش جوده سېکین کېتماقده. چنگ-تۉزان نه‌فقط حرکتنی قیینلشتیردی، بلکه ساغلیق و اېکولوژیک معمالرنی هم کېلتیریب چیقردی. کۉپ ترانسپورت حرکتی بۉلیشیگه قره‌مه‌ی، منتظم سوو سېپیلمه‌یدی و مسوول کمپنی صفت و تېزلیککه یېترلی اعتبار بېرمه‌یپتی. مسووللردن چنگنی کمه‌یتیریش و لایحه‌نی تېزراق یکونلش بۉییچه جدّی چاره‌لر کوته‌میز.»
اونینگ قۉشیمچه قیلیشیچه، ریکشا‌لر سانی نینگ کۉپه‌ییشی و یۉل‌نینگ یریم تیارلیگی حرکت ترتیبسیزلیگیگه همده اوشبو یۉلده یۉل-ترانسپورت حادثه‌لری نینگ کۉپه‌ییشیگه سبب بۉلماقده.
او شونده‌ی دېیدی: «سۉنگگی کونلرده بو یۉلده بیر نېچته یۉل-ترانسپورت حادثه‌لری صادر بۉلدی. یۉل معیاری قوریلمسه و ترانسپورت حرکتی اوستیدن نظارت بۉلمه‌سه، طبیعی که خوف آرته‌دی. مسووللردن بو یۉل قوریلیشینی جدّی نظارت قیلیشنی و لایحه‌نی ینه چۉزیلیشیگه یۉل قۉیمسلیکنی سۉره‌یمیز، چونکه آدملر هر کونی وقت یۉقاتیش، هوا افلاسلنیشی و ترانسپورت معمالری نرخینی تۉله‌ماقده.»
شو بیلن بیرگه، اَیریم ترانسپورت هیداوچیلری یریم تیار یۉللر و ترمیملش ایشلری نینگ سستلیگی اولرنینگ کونده‌لیک ایشیگه جدّی قیینچیلیک توغدیره‌یاتگنینی ایته‌دی. اولرنینگ فکریچه، قوروق موسمده‌گی چنگ-تۉزان، یامغیرلی موسمده‌گی لای و تیربندلیکلر حرکتنی قیینلشتیریب، ترانسپورت واسطه‌لرینی ترمیملش خرجتلرینی هم آشیرماقده.
کابل شهریده تکسی هیداوچیلریدن بیری ظریف نینگ ایتیشیچه، شهرنینگ کۉپ جایلریده کابل شهر حاکمیتی یۉل قوریلیشینی باشله‌گن، بیراق بو لایحه‌لر سېکین و سست کېتماقده. اونینگ فکریچه، شهید تۉرت یۉللیگی، برکی، تایمنی و خیرخانه کوتلی کبی حدودلرده هم یۉل قوریلیشی کېچیکیب قالگن.
او شونده‌ی دېیدی: «یریم تیار یۉللردن جوده قیینه‌لیه‌پمیز. برکی تۉرت یۉللیگی، تایمنی، خیرخانه کوتلی و باشقه جایلرده هم شونده‌ی حالت. بو یۉللر چنگ-تۉزان و تیربندلیکنی آشیردی. اَیریم کمپنیلر ایکّی ییلدن بېری شرطنامه آلگن، اما ایش توگه‌مه‌گن و یکون وقتی هم نامعلوم. چنگ و ترتیبسیزلیک مو‌ترلرگه ضرر یېتکزه‌دی و سفر وقتینی اوزه‌یتیره‌دی. خیرخانه کوتلی حدودیده هم ایش باشلنگنیگه انچه بۉلگن، اما هنوز توگللنمه‌گن.»
اوّلراق طالبان نینگ کابلده‌گی شهر حاکمیتی یۉل قوریلیشی لایحه‌لری شهر بۉیلب کېچیکیشسیز دوام اېته‌یاتگنینی، اگر کېچیکیش انیقلنسه، شرطنامه قیلینگن شرکتلرگه آگاهلنتیریش بېریلیشینی و ضرورت بۉلسه، شرطنامه‌لری بېکار قیلینیشینی بیلدیرگن اېدی. شونینگدېک، اوشبو اداره پایتختده یوزلب کیلومتر یۉل قوریلگنی و ینه اۉنلب رواجلنیش لایحه‌لری عملگه آشیریله‌یاتگنینی معلوم قیلگن اېدی.
