ایکی کونلیک انترنت نینگ اوزیلیشی افغانستان اقتصادی و خلق حیاتیگه آغیر باسیم اۉتکزدی
۸صبح، کابل: مملکت نینگ بیر قطار فقرالری تأکیدلشیچه، افغانستانده انترنت و علاقه خدمتلری نینگ اۉچیریلیشی عادی آدملر نینگ کونده‌لیک حیاتینی ایزدن چیقرگن و کۉپلب تجارتلرگه جدی ضرر یېتکزگن.
محلی منبعلر، ۹ -میزان، چارشنبه کونی، ۸صبح کونده‌لیگیده ایتیشلریچه، سۉنگگی ایکی کون دوامیده بانکلر، پروازلر، صرافلر و مالی آلیب- بیریشلر دېیرلی بوتونله‌ی توخته‌ب قالگن.
اولر نینگ سۉزلریگه کۉره، بو حالت اقتصادی ایلنیشنی فلج قیلیب، خلق حیاتیگه قۉشیمچه باسیم اۉتکزگن.
بوندن تشقری، سیم-کارت‌لر نینگ ایشله‌مه‌ی قالیشی ایچکی علاقه تیزیمینی هم بوتکول ایزدن چیقرگن و حتا که عادی عایله‌وی قۉنغیراقلر هم عملگه آشمه‌گن.
مکتب اۉقووچیلری و طلبه‌لر اېسه، تۉغریدن-تۉغری بو وضعیتدن ضرر کۉرگنینی اَیتماقده. انترنت نینگ کېسیلیشی اولر نینگ کۉپینی آنلاین درسلردن محروم قیلدی.
بیر قطار افغان فقرالری آگاهلنتیردیکی، طالبان نینگ بو چاره‌لری مملکتنی بیر نېچه عصر آرقه‌گه قیترگن، بو یېرده نه علاقه اساسی توزیلمسی بار و نه یارقین کېله‌جک امیدی کۉرینماقده.
اولر نینگ فکریچه، بونده‌ی سیاستلر مملکتنی ینه‌ده کۉپراق انزواگه تارتیب، ترقیات و رواجلنیشگه بۉلگن برچه امیدلرنی یۉققه چیقرماقده.
