بیرلشگن ملتلر تشکیلاتی پاکستان و طالبان اۉرته‌سیده‌گی تۉقنه‌شوولر درحال تۉخته‌تیلیشینی سۉره‌دی
۸صبح، کابل: بیرلشگن ملتلر تشکیلاتی کابلده مخدره ماده‌لرگه چلینگنلرنی دوالش مرکزی‌نینگ نشانگه آلینگنیدن خواطر بیلدیرگن و طالبان همده پاکستان‌نی تۉقنه‌شوولرنی درحال تۉخته‌تیشگه چقیرگن.
بیرلشگن ملتلر تشکیلاتی باش کاتبی‌نینگ سۉزلاوچیسی فرهان حق، چهارشنبه کونی، ۲۷-حوت، اۉتکزیلگن خبری بیر ییغینده ایتیشیچه، پاکستان کابلده «امید» ناملی مخدره ماده‌لرگه چلینگنلرنی دوالش مرکزینی نشانگه آلگن و اۉنلب آدم جان بېرگن.
اونینگ تاکیدلشیچه، ساغلیق مرکزلر و عامه‌وی انشااتلر حربی هجوملر نشانی بۉلمسلیگی کېره‌ک.
افغانستانده بیرلشگن ملتلر تشکیلاتی‌نینگ یاردم هیاتی (یوناما) تۉقنه‌شوولر باشلنگنیدن ۱۶- مارچگچه ۷۵ نفر تینچ اهالی جان بېرگنی ینه ۲۰۰ دن آرتیق آدم یره‌لنگنینی حجتلشتیرگن.
بیرلشگن ملتلر تشیکلاتی‌نینگ انسان حقلری بۉلیمی ایلگری‌راق پاکستان تامانیدن کابلده‌گی مخدره ماده‌لرگه چلینگنلرنی دوالش مرکزی‌نینگ نشانگه آلینیشی یوزه‌سیدن مستقل و شفّاف تېرگاو اۉتکزیلیشینی طلب قیلگن اېدی.
بیرلشگن ملتلر تشکیلاتی تاکیدلشیچه، تینچ اهالی اوشبو تۉقنه‌شوولرنینگ اېنگ کتّه ضررینی کۉرماقده.
طالبان دعوا قیلیشیچه، پاکستان نینگ ایکّی کېچه آلدین کابلده‌گی مخدره ماده‌لرگه چلینگنلرنی دوالش مرکزیگه قیلگن هجومیده کمیده «۴۰۰» کیشی جان بېرگن.
