جهان ساغلیقنی سقلش تشکیلاتی‌نینگ افغانستاندهگی ایسّیق تۉلقینی حقیده آگاهلنتیریشی
جهان ساغلیقنی سقلش تشکیلاتی (WHO) نینگ افغانستاندهگی وکالت‌خانه‌سی مملکتده هوا حرارتی‌نینگ آشیشی سببلی اهالینی اۉزلری و عایله‌لرینی کوچلی ایسّیقدن حمایه قیلیش اوچون ضرور چاره‌لرنی کۉریشگه چقیردی.
اوشبو تشکیلات شنبه کونی، ۲۷ سرطان، ایکس صحیفه‌سیده ترقه‌تگن خبریده منتظم روشده سوو ایچیش، یوپقه و کېنگ کییملر کییش، کېنگ سایبانلی یاکه تومشوقلی باش کییملردن فایده‌لنیش، ساووق سووده چۉمیلیش همده کون دوامیده بیر نېچه مرته یېنگیل طعام استعمال قیلیش اۉرگانیزمنی ایسّیقدن حمایه قیلیشگه یاردم بېریشینی بیلدیردی.
جهان ساغلیقنی سقلش تشکیلاتی اهالی‌دن ایسّیق طفیلی یوزه‌گه کېله‌دیگن خوفلرنی کمه‌یتیریش اوچون سایه‌ده قالیش و هر کونی ایکّی-اوچ ساعتنی سلقین جایلرده اۉتکزیشنی سۉره‌دی.
تشکیلات آگاهلنتیریشیچه، ایسّیق هواده آغیر جسمانی فعالیت بیلن شغللنمسلیک و باله‌لرنی تۉخته‌ب تورگن موترلرده قالدیرمسلیک کېره‌ک.
شو بیلن بیرگه، طالبان‌نینگ طبیعی آفتلرگه قرشی کوره‌ش بۉییچه ملی تیّارگرلیک باشقرمه‌سی هم جاری هفته‌‌نینگ چهارشنبه کونی مملکت‌نینگ شمالی و غربی حدودلریده هوا حرارتی ۴۵ درجه سانتی‌گراددن یوقاریگه کۉتریلیشی احتمالی بارلیگینی معلوم قیلدی.
