۸صبح، کابل: په افغانستان کې د ایران پخوانی سفیر ابوالفضل ظهرهوند وايي، د دې ناستې له جوړېدو د روسیې موخه د طالبانو ژوندي ساتل دي.
ظهرهوند تېره چهارشنبه د تلې میاشتې په ۵مه له ایلنا خبري اژانس سره په مرکه کې ویلي، چې روسیه غواړي د امریکا د فشارونو له امله په افغانستان کې د خپلې ګټې لپاره ګامونه پورته کړي او له همدې امله د مسکو ناسته مثبته ګڼل کېدای شي چې دا اقدام به بالاخره د مسکو دریځ پیاوړی کړي.
د هغه په وينا، د دې ناستې جوړول په داسې حال کې چې چين افغانستان ته خپل سفير لېږلى دى، د روسيې له خوا يو ډول نوښت دى.
هغه څرګنده کړې ده: «په دې ناسته کې د پاکستان ترڅنګ د روسیې، قزاقستان، قرغزستان، تاجکستان، ترکمنستان، ازبکستان، ایران، چین او هند د هېوادونو ځانګړي استازي ګډون لري؛ خو په ورته وخت کې مسکو اعلان کړی چې د دې غونډې تر ټولو مهمه موضوع به په افغانستان کې د یوه ټول شموله موقت حکومت جوړول وي.»
دغه ایراني دیپلومات ویلي: «باید پوه شو چې د یوه ټول شموله حکومت جوړول، لکه څنګه چې له نوم څخه څرګندېږي، په افغانستان کې د ټولو سیاسي او توکمیزو ډلو حضور ته اړتیا لري، نه دا چې یوازې امیرخان متقي د طالبانو د بهرنیو چارو د سرپرست وزیر په توګه وټاکل دې غونډې ته را وبلل شي.
د افغانستان د وضعیت په اړه د روسیې په کوربتوب د مسکو ناسته نن (جمعه د تلې میاشتې په ۷مه) پیل شوې ده.
د روانې اوونۍ د دوشنبې په ورځ د طالبانو د بهرنیو چارو وزارت سرپرست امیرخان متقي په دې ناسته کې د ګډون لپاره د یوه پلاوي په مشرۍ روسیې ته لاړ.
تر دې مخکې د افغانستان لپاره د روسیې د ولسمشر ځانګړي استازي ضمیر کابلوف له یوې روسي رسنۍ سره په مرکه کې ویلي وو، چې طالبان د دې ناستې ګډونوال نه؛ بلکې د دوی مېلمانه دي.
د ویلو وړ ده، چې په افغانستان کې واک ته د طالبانو له رسېدو سره یاده ډله له مسکو سره نږدې اړیکې لري او دا روسیې ته د طالب چارواکو لومړی سفر دی.