۸صبح څه موده وړاندې په یوه راپور کې موندلې وه چې د غزني ښار د تر ځمکې بازار پروژه چې ټاکل شوې وه، د طالبانو له خوا د ۴۰۰ میلیونه افغانیو په لګښت پلې شي، د اوبو د چینو د راوتلو او د سوداګریزو مارکېټونو پر خوا د کیندل شوې سیمې د دېوالونو د نړېدو له امله درېدلې ده. د طالبانو ښاروالۍ د دغه راپور له خپرېدو وروسته، په ټولنیزو شبکو کې د مستعارو حسابونو له لارې د تبلیغاتو په خپرولو او پر سیمهییزو رسنیو د فشار په راوستلو سره هڅه کړې چې د ننداریزو کارونو په کولو سره وښيي چې په دې سیمه کې د پروژې چارې روانې دي.
سرچینې وايي، د ۸صبح د راپور له خپرېدو وروسته د طالبانو ښاروالۍ قراردادي شرکتونه راغوښتي او د لسګونو موټرو خاورو په وسیله یې د اوبو چینې پوښلې دي. د سرچینو په وینا، د کیندل شوې سیمې نړېدلو دېوالونو ته څېرمه هم د خاورو غونډۍ جوړې شوې او عکسونه یې په ټولنیزو پاڼو کې خپاره شوي دي.
د دې راپور موندنې ښيي چې اوس د دې پروژې د جوړولو چارې پر دوو برخو وېشل شوې دي. د موندنو له مخې، د پروژې یوه برخه چې د فرخي څلورلارې خوا ته موقعیت لري، د طالبانو د ښاروالۍ له خوا د عکسونو او ویډیوګانو د اخیستو لپاره کارول شوې، څو د پروژې د پرمخ وړلو ناکامي پټه پاتې شي. د پروژې بله برخه چې د ختمالمرسلین جومات او کلاهسبز څلورلارې ته څېرمه موقعیت لري، د اوبو د څو چینو له راوتلو سره مخ ده او په دې برخه کې کار په بشپړه توګه درېدلی دی.
د غزني اوسېدونکی سردار وايي: «زه خپله د اوبو د چینو د راوتلو او د کلاهسبز د تر ځمکې لاندې بازار د پروژې د بشپړ درېدلو شاهد یم. بنبست لا هم دوام لري. د کیندل شوې سیمې دېوالونه هره ورځ د پلیولارو او څنګ ته پرتو دوکانونو پر لور لا ډېر نړېږي او د اوبو پمپونه لا هم شپه او ورځ کار کوي، څو اوبه د کندې له تله وباسي. د پروژې د واقعي پرمختګ هېڅ نښه نه لیدل کېږي.»
د غزني بل اوسېدونکی احمد (مستعار نوم) وايي: «بې له دې چې په ټولنیزو رسنیو او تلویزیونونو کې د لیدلو شویو موضوعاتو په اړه قضاوت وکړم، هغه څه وایم چې خپله مې په سترګو لیدلي او قضاوت یې خلکو ته پرېږدم. هر څوک چې وايي کار روان دی او هېڅ ستونزه نشته، را دې شي او د دغه بازار په شمالي برخه کې چې د ختمالمرسلین جومات ته څېرمه ده، یو ځل د کیندل شوې سیمې ځای ته لاړ شي، یا له پورته ورته وګوري، څو وویني چې دلته په رښتیا د اوبو څو چینې شته او د شپې اوبه له کوم ځایه ایستل کېږي.» نوموړی زیاتوي: «لمر په دوو ګوتو نه پټېږي. طالبان چې هر څومره تبلیغات وکړي او د چینو پر سر چې د خاورو په اچولو سره هر څومره هڅه وکړي، د خلکو سترګې نه شي تړلای.»
په غزني کې د طالبانو ښاروالۍ نږدې څلور میاشتې وړاندې د غزني ښار د مرکزي برخې د کلاهسبز په سیمه کې د ترځمکې لاندې یوه سوداګریز مارکېټ د جوړولو د کار د پیل خبر ورکړی و. د طالبانو تر کنټرول لاندې دې ادارې اعلان کړی و چې دغه مارکېټ به تر ځمکې لاندې په دوو پوړونو کې جوړ شي؛ خو ځایي سرچینو ۸صبح ورځپاڼې ته تایید کړې چې د دغه مارکېټ د جوړولو لپاره د ځمکې د کیندلو پر مهال د ځمکې په شپږ متره ژورتیا کې له څو ځایونو د اوبو چینې راوتلې او د پروژې د کار دوام له بندون سره مخ شوی دی.
سرچینو تر دې وړاندې ویلي وو چې له دې سیمې د خاورو له ایستلو او د اوبو له راوتلو وروسته، د ترځمکې لاندې بازار د جوړولو لپاره د کیندل شوې سیمې دېوالونه د دواړو خواوو د سوداګریزو مارکېټونو پر لور کاږه شوي او د دغو ودانیو د کېناستو یا نړېدو احتمال شته.
د سرچینو په وینا، د طالبانو دغه پروژه عملاً درېدلې او د شاوخوا ودانیو د نړېدو خطر جدي دی؛ خو طالبانو تر اوسه د دې ستونزې لپاره هېڅ تخنیکي او دوامدار حللاره نه ده موندلې.
