۸صبح، کابل: د افغان سولې لپاره د امریکا ځانګړي پخواني استازي زلمي خلیلزاد د افغانستان د پاشل کېدو خبرداری ورکړی او د جوبایدن له دولته یې غوښتنه کړې، چې د پاشل کېدو د مخنیوي په موخه دې له طالبانو سره تعامل وکړي.
خلیلزاد د چهارشنبې پر ورځ د لړم پر پنځمه واشنګتن کې «د نړیوالې سولې لپاره د کارنګي بنسټ» سره په خبرو کې ویلي، امریکا دې په افغانستان کې د انساني ناورین د کموالي په موخه له طالبانو سره کار وکړي.
نوموړي پخوانی ولسمشر اشرف غني د دغو ستونزو او ناورین د رامنځته کېدو پړ بللی او ویلي دي، چې امریکا دې له طالبانو سره د اړیکو د عادي کولو په موخه هڅه وکړي.
خلیلزاد د طالبانو د حکومت د پرځېدو خبرداری ورکړی او زیاته کړې ده، که مرسته ونه شي، دا ماتې به «لوی انساني ناورین» رامنځته او د زرګونه افغانانو د کډوالۍ لامل به شي او همدارنګه به د سیمې د بېثباتۍ او ترهګرو ډلو ته به د امن پر پټنځای بدل شي.
د افغان سولې لپاره د امریکا پخواني استازي ټينګار کړی، طالبان له امریکا سره د خپلو اړیکو د عادي کولو په لټه دي او له امریکا یې غوښتي، چې کابل کې خپل سفارت بېرته پرانېزي او مالي تحریم لغوه کړي. د نوموړي په خبره، طالبان افغانستان سره د اقتصادي مرستو غوښتونکي دي.
خلیلزاد زیاته کړې: «موږ باید له هغوي سره کېنو، ترڅو پر یوې لارې هوکړه وکړو، د بشري حقونو او له هغوي چې د کومو غوښتنو په لټه یو، په پام کې نیسي.»
نوموړي یو ځل بیا ټينګار کړی، چې طالبان بدل شوي او د دوحې هوکړې ته ژمن دي. هغه ويلي، طالبان ژمن دي، چې د افغانستان له خاورې به امریکا ته کوم ګواښ نه رامنځته کېږي.
خلیلزاد د طالبانو پر وړاندې د امریکا بدبیني پرځای بللې، خو ویلي دي، چې د ګوښه کېدو پر ځای دې له ډیپلوماسۍ کار واخیستل شي.
نوموړي د افغان امنیتي ځواکونو او پخواني ولسمشر پر ضعیفه کړنو نیوکه کړې او ویلي دي، غني باوري و چې د امریکا له شتون پرته طالبانو ته په پوځي ډګر کې ماتې ورکوي. د ده په خبره، له همدې امله یې د خپلې استعفا په اړه د طالبانو غوښتنو ته پام ونه کړ.
د خلیلزاد په باور، د غني ناسمه محاسبه دا وه، چې فکر یې نه کاوه امریکا په شاتګ کې جدي ده او هېڅکله به هم شاتګ ونه کړ.
طالبان د روان کال د زمري پر ۲۴ پر کابل واکمن شول. تراوسه نړۍ د هغوي حکومت په رسمیت پېژندلی نه دی او امریکا د افغانستان بانک ارزي زېرمې کنګل کړې دي. طالبانو په وار وار له نړۍ غوښتي، چې حکومت یې په رسمیت وپېژني او له هغوي سره د تعامل لاره خپله کړي.
نړیوالې ټولنې تراوسه دې غوښتنو ته مثبت ځواب ورکړی نه دی او ویلي دي، چې له طالبانو سره د اړیکو په تړاو به په احتیاط ګام اخلي.
