څنګه کولی شو زده کوونکي زده کړو ته وهڅوو؟

په ښوونيزو او روزنيزو مراکزو کې يوه لويه ستونزه چې ښوونکي او لارښوونکي ورسره لاس او ګرېوان دي، هغه په زده کوونکو کې د انګېزې نه شتون او يا له لوست سره نه لېوالتيا ده. د دې ستونزې د حل لپاره به په دې ليکنه کې تاسو ته ځينې لنډې لارښوونې وړاندې شي.
۱- د زده کوونکو د برياليتوب لپاره ډالۍ په پام کې ونيسئ، د ډالۍ په ورکولو هغوی نه يوازې دا چې خوشحالېږي؛ بلکې د نورو برياليتوبونو لپاره يې هڅې لاپسې ډېرېږي.
۲- د زده کوونکو فردي توپيرونو ته په درناوي بايد هېڅکله د هغوی ترمنځ توپيري چلند ونه کړو.
۳- هڅه دې وشي چې په ټولګيو کې د زده کوونکو ترمنځ ډېر عاطفي مسايل مطرح او له سختګيرۍ، قيدګيرۍ، توپيري چلند او منفي قضاوتونو په کلکه ډډه وشي.
۴- هڅه وکړئ چې ژر تر ژره د آزموينو د اخېستلو سره زده کوونکو ته د هغوی پايلې اعلان کړئ.
۵- د دې لپاره چې له لوست سره د زده کوونکي لېواله وساتئ، هغوی ته د هر درس موخه او ګټه په مفصل ډول تشريح کړئ.
۶- زده کوونکو ته د زده کړو څرنګوالی او د عملي تجربو څرنګوالی مشخص او ورزده کړئ.
۷- د دې لپاره چې په زده کوونکو کې د مسوليت احساس پيدا شي، له هغوی وغواړئ چې په ټولګي کې تدريس شوی درس له نورو ټولګيوالو سره شريک او ورته زده يې کړي.
۸- د زده کوونکو د درسي ستونزو په تړاو له هغوی سره بحث او شننه وکړئ.
۹- په تولګي کې په انفرادي توګه د زده کوونکي تشويق او هڅول ډېره ګټه لري.
۱۰- درسي مطالب بايد په ترتيب سره له آسانه نيولې تر ستونزمنو پورې تشرېح شي.
۱۱- د زده کوونکو ترمنځ بايد د ناسالمو سیالیو مخه ونيول شي.
۱۲- د زده کړې بهیر بايد (ګواښوونکی) نه وي.
۱۳- د زده کړو بهیر بايد معياري او د وخت له ټکنالوژۍ سره برابر وي.
۱۴- د زده کوونکو ترمنځ ذهني او تحريکوونکې پوښتنې مطرح کړئ، ترڅو هغوی د موضوع په اړه بحث او شننه وکړي.
۱۵- د زده کوونکو جسمي او روحي حالت ته په کتو هغوی ته په دې برخه کې لارښوونې وکړئ.
۱۶- د ټولګي چاپېريال بايد په ښو او منظمو طرحو سره زړه راښکونکی کړئ.
۱۷- د ازموينو په اخېستلو کې بايد په خپلو ژمنو عمل وکړئ.
۱۸- له زده کوونکو سره بايد ښه اخلاق او غوره رويه وشي.
۱۹- د زده کوونکو د وړتياو لوړولو لپاره بايد هغوی ته د لوست پرمهال ونډه ورکړل شي او ډول ډول پوښتنې ترې وشي.
۲۰ – په دې بايد ځان ډاډه کړو چې زده کوونکي په رښتيا سره د لوست پيلولو ته چمتو دي.