د سولــې د ټينګښت غــوښتـنه

د سوېلي حوزې قومي مشرانو د سولې غوښتنې لپاره پر حکومت غږ وکړ، چې د واک لپاره دې د سولې پر وړاندې خنډونه نه رامنځته کوي.
دغو قومي مشرانو د سولې غوښتنې ترڅنګ د وروستیو ناامنیو، د فساد او کمزورې حکومتولۍ د مخنيوي غوښتنه وکړه.
دوی له حکومته غواړي چې د شخصي ګټو او واک د دوام په خاطر دې د سولې په وړاندې خنډونه نه رامنځته کوي.
د غونډې برخوالو همدا ډول پر حکومت نيوکه وکړه، چې د سولې په بین الافغاني خبرو کې یې مهم او بانفوذه اړخونه له پامه غورځولي دي.
دوی له ولسمشره ګيله وکړه چي خاصي کړۍا نحصار کړی او د سيمي له واقعیتونو یې ليري ساتلی دی.
په دغه غونډه کي د قومونو او قبایلو مخکیني وزیر ګل اغا شېرزي پر افغان حکومت، طالبانو او بهرنیانو غږ وکړ، چي نور په هېواد کې وژنې بندې کړي.
شېرزي زیاته کړه يوه خاصه کړۍ د قومونو ترمنځ د جنجال هڅه کوي چې مخه یې باید ونیول شي.
د ولسي جرګې مخکني غړي لالي حمیدزي بیا وویل چې ولسمشر بايد د کندهار د ناامنیو له عاملینو پوښتنه وکړي او په ولسواليو کي هغه قوماندانان بايد تر تعقيب لاندي ونيسي چي په قصدي ډول يې امنيتي پوستې خوشې کړې دي.
د غونډې نور برخوال وايي چې یوه ځانګړې کړۍ هڅه کوي، د شخصي ګټو په خاطر قومي تعصب ته لمن ووهي.
په دغه غونډه کې داسې مهال د سولې غوښتنې ترڅنګ، په کندهار کې ،پر کمزورې حکومتولۍ او د نا امنیو پر زیاتېدو نيوکه وشوه، چې د دغه ولایت په شپږو ولسوالیو کې جګړه روانه ده او ګڼې سيمې له جګړې پرته طالبانو ته پرېښودل شوې دي.