د افغانستان لومړنۍ جنراله مړه شوه

د عامې روغتيا وزارت مرستیال، د افغانستان د روغتیا وزارت د پخوانۍ وزيرې او لومړنۍ جنرالې، سهيلا صديق پر مړینه خواشیني څرګنده کړه.
د عامې روغتیا وزارت د صحي خدماتو معين، وحيد مجروح، د روان کال د ليندۍ په ۱۴مه، د جمعې په ورځ په خپل فيسبوک کې نوموړې «د افغانستان د طبي ټولنې او وسله والو ځواکونو تر ټولو ځلېدونکې څېره» ياده کړې ده.
ملي دفاع وزارت هم د یوې خبرپاڼې په خپرولو سره ويلي چې سهیلا صدیق، د روان کال د ليندۍ په ۱۴مه، د کابل په وزير محمد اکبر خان روغتون کې، د ورپېښې ناورغۍ له امله مړه شوه. مېرمن صديق، د ۱۳۲۷ کال د کب په ۲۰مه په کابل ښار کې دې نړۍ ته سترګې وغړولې.
مېرمن صديق د ښوونځي زده کړې، د کابل ښار په ملالۍ لېسه کې او لوړې زده کړې يې د کابل پوهنتون د طب په پوهنځي او د مسکو نمبر (۱) طب دولتي انستیتوت کې بشپړې کړې وې. مېرمن صديق په کال ۱۳۵۴ کال کې، د روسيې له دولتي طب انستیتوت څخه د دوکتورا سند ترلاسه کړی ؤ.
ملي دفاع وزارت وايي چې مېرمن جنرال صديق، د خپلو زده کړو له بشپړولو وروسته، افغانستان ته ستنه شوه او د محمد داوود خان د واک په دوره کې يې، د طبي علومو اکاډمۍ په ۴۰۰ بستريز روغتون کې په کار پیل وکړ.
په همدې توګه سهيلا صديق په ۱۳۵۷ کې د جراحې ډاکترې په توګه، د اردو مرکزي روغتون د «عمليات خونې سرويس شف» برخه کې خپل کار پيل کړ.
هغې همدارنګه، په کال ۱۳۷۲ ل.ل کې، د سردار محمد داوود خان روغتون کې د سرجراحې او په کال ۱۳۷۵ کې، د طبي علومو اکاډمۍ د قومندانې په توګه کار کړی دی.
د ملي دفاع وزارت د معلوماتو په اساس مېرمن جنرال صديق، په کال ۱۳۸۱ ل.ل کې د عامې روغتیا وزيرې په توګه د کابينې غړې شوه او په کال ۱۳۸۴ کې د افغانستان اسلامي جمهوري دولت د سلاکارې په توګه وګومارل شوه.
ملي دفاع وزارت ويلي دي چې مېرمن صديق د عمومي جراحۍ متخصصه وه او ۴۰ کاله یې په ستونزمنو شرایطو کې خپلو خلکو او هېواد ته صادقانه خدمت وکړ.