د لوګر ولایت د برکي برک ولسوالۍ سرچینې په دې ولسوالۍ کې د طالبانو ولسوال په بډو اخیستلو، زورزیاتي او د خلکو په ګواښلو تورنوي. د سرچینو د ادعا له مخې، د طالبانو ولسوال نورالله غالب، د برکي راجان بازار له هټيوالو څه باندې یو نیم میلیون افغانۍ بډې اخیستې او ژمنه یې ورسره کړې چې د سړک سور به کم کړي، څو د هغوی هټي پر خپل ځای پاتې شي. د برکي برک اوسېدونکي د معیاري نقشې له مخې د یادې شوې پروژې د بشپړ پلي کېدو غوښتنه کوي او ټینګار کوي چې عامه حقونه باید د شخصي ګټو قرباني نه شي.
سرچینې وايي، نورالله غالب د امیرخان زوی او د لوګر ولایت د خروار ولسوالۍ اصلي اوسېدونکی چې اوس په برکي برک ولسوالۍ کې د طالبانو د ولسوال په توګه دنده ترسره کوي، په دې ولسوالۍ کې د سړک جوړولو له پروژو بډې اخلي او د معیاري نقشې له مخې یې د پلي کېدو مخه نیسي. سرچینې له طالبانو غواړي چې دا موضوع وڅېړي او اجازه ورنه کړي چې سړکونه د ټاکل شویو معیارونو پر خلاف جوړ شي.
د سرچینو په وینا، د برکي برک له څلورلارې د برکي راجان تر ۶۲ بستریز روغتون پورې د سړک جوړولو پروژه یوه خصوصي شرکت ته سپارل شوې ده. سرچینې زیاتوي چې دویمه پروژه د طالبانو په ټولګټو وزارت پورې اړه لري، چې د دوشیخ له څلورلارې د څرخ ولسوالۍ تر دبر پله پورې غځېږي.
سرچینې څرګندوي چې د برکي راجان بازار دننه هم د سړک جوړولو چارې روانې دي او د دغه سړک ټاکل شوی سور ۱۷.۵ متره دی. د سرچینو د ادعا له مخې، د برکي راجان بازار یو شمېر د هټیوال هڅه کوي چې د طالبانو د ولسوال په همکارۍ د بازار دننه د سړک ټاکل شوی سور راکم کړي.
سرچینې ادعا کوي چې نورالله غالب د سړک د سور د کمولو په بدل کې له هټيوالو شاوخوا یو نیم میلیون افغانۍ بډې اخیستې او ژمنه یې ورسره کړې چې د سړک سور به راکم کړي. د سرچینو په وینا، نوموړی اوس په دې اړه د سړک جوړولو له شرکت سره چنې وهي.
د برکي برک ولسوالۍ اوسېدونکي وايي، دوی غواړي چې د سړک جوړولو پروژه له ټاکل شوي سور سره سم او له هر ډول بدلون پرته پلې شي. هغوی د سړک د سور کمول د عامه حقونو تر پښو لاندې کول او عامه ګټو ته زیان رسول بولي او د طالبانو له چارواکو غواړي چې دا موضوع په جدي توګه وڅېړي.
د هغوی په وینا، طالبان باید د برکي برک بازار دننه د سړک جوړولو پروژې اسناد، قراردادونه او تخنیکي نقشه وڅېړي، څو د سړک اصلي او منظور شوی سور معلوم شي. هغوی زیاتوي چې د عامه حقونو د ساتنې، اداري فساد د مخنیوي او د پرمختیايي پروژو د پلي کېدو د روڼتیا لپاره باید لازم اقدامات وشي.
په همدې حال کې، سرچینې ادعا کوي چې د طالبانو ولسوال د ازرې ولسوالۍ د ولسوال په توګه د دندې پر مهال د نشهيي توکو له قاچاق کوونکو سره هم اړیکې لرلې او له هغوی یې باج اخیسته.
د سرچینو په وینا، نورالله غالب د ولسوالۍ دننه باغ هم پلورلی او پیسې یې جېب ته اچولې دي. سرچینې زیاتوي چې نوموړی په هغو چارو کې هم لاسوهنه کوي چې د ده په واک کې نه دي، او خلک د وېرې له امله د خپل نظر د څرګندولو او شکایت کولو جرئت نه لري.
په بله پېښه کې، د سرچینو په وینا، څو ورځې وړاندې د افغانستان برېښنا شرکت کارکوونکو د برکي راجان پر سړک د برېښنا د ستنو د لګولو پر مهال د کار د ترسره کولو لپاره د سړک لاره تړلې وه. په همدې حال کې د طالبانو د ولسوال موټر هم د موټرو په کتار کې درېدلی و. سرچینې وايي، د افغانستان برېښنا شرکت یوه کارکوونکي د احتمالي خطرونو له امله له ولسواله وغوښتل چې ورنږدې نه شي. د سرچینو په وینا، د طالبانو ولسوال له موټره ښکته شو، دغه کارکوونکی یې وواهه او ورته یې وویل: «ته نه پوهېږې چې زه څوک یم؟» سرچینې زیاتوي چې د لوګر ولایت د طالبانو ډېری ځايي چارواکي هم له دې پېښې خبر دي، خو د هغوی په وینا، هېڅوک د نظر څرګندولو یا په دې اړه د اقدام کولو جرئت نه لري.
سرچینې دغه راز ادعا کوي چې څو ورځې وړاندې د طالبانو ولسوال د برکي برک بازار دننه یو هلک سخت وهلی دی. د سرچینو په وینا، دغه هلک د واده د کاروان له موټرو د پیسو غوښتنه کړې وه او د طالبانو ولسوال د خلکو په وړاندې وهلی دی.
تر دې وړاندې، د روڼتیا نړیوال سازمان د فساد د درک د شاخص په خپل کلني راپور کې ویلي وو چې د طالبانو تر واک لاندې افغانستان په ۲۰۲۵ کال کې د نړۍ له تر ټولو فاسدو هېوادونو و. د دغه راپور له مخې، افغانستان له ۱۰۰ نمرو ۱۶ نمرې اخیستې او د ۱۸۲ هېوادونو په منځ کې یې ۱۶۹م ځای خپل کړی دی.
تر دې وړاندې د طالبانو د کورنیو چارو وزارت سرچینو هم په دغه وزارت کې د پراخ فساد خبر ورکړی و. د سرچینو په وینا، طالبان په ټولو امنیتي حوزو کې له هټیو، پلورنځیو، رستورانټونو، نانوایانو، مستريخانو، موبایلپلورنځیو او ګڼو نورو کاروبارونو په ناقانونه توګه پیسې اخلي. د سرچینو د معلوماتو له مخې، د وسلو د لېږد د جوازونو د صادرولو، د وسلو د وېش، د جنايي دوسیو د څېړلو، د نیول شویو کسانو د خوشې کولو، د تېلو د وېش او د کسانو د ګومارنې په بهیرونو کې هم بډې اخیستل کېږي.
له دې سره هممهاله، سرچینې تاییدوي چې د طالبانو تر واک لاندې د ترافیکو ریاست کې هم په پراخه کچه بډې اخیستل کېږي اود موټرچلونې نړیوال جوازونه د دې ډلې د خپلوانو له لارې او د پیسو په بدل کې صادرېږي. سرچینې زیاتوي چې خلک د طالبانو تر واک لاندې په نورو ادارو کې هم له بډو اخیستلو، زورزیاتي او د دندو له نه ترسره کولو شکایتونه لري.
