٨صبح، غور: غور کې ځايي سرچینې وايي چې د طالبانو او د «یامه» بوټي د قاچابرو ترمنځ نښته کې، یو قاچاقبر ټپي شو او درې نور ونیول شول.
ځایي سرچینې له ٨صبح ورځپاڼې سره په خبرو کې وایي چې دغه نښته د وري په ٧مه د دوشنبې شپې ناوخته، د غور (الفاروق ولسوالۍ) اړوند سیمو کې رامنځته شوې ده.
د سرچینو د معلوماتو پر بنسټ، ددغه بوټي یو شمېر قاچاقبر، د طالبانو ډلې د جنګیالیو په کمین کې ور سره ونښتل.
لا روښانه نده چې په دې نښته کې د طالبانو جنګیالیو ته هم زیان اوښتی دی کنه؟
غور کې طالبانو هم وسله والو قاچاقبرو سره د خپلو جنګیالیو نښته تایید کړې ده.
په وروستیو کلونو کې، غور له هغو ولایتونو نه و چې هلته د «یامه» د بوټي ډېر قاچاق ترسره شوی دی. طالبان ددغه بوټي له قاچاقبرو نه مالیه اخلي.
«یامه» د غور له غرنیو بوټو نه دی چې د سرچینو د اطلاعاتو پر بنسټ، له هغه نه د مخدر توکو په تولید کې کار اخیستل کیږي.
