په ننګرهار او کونړ ولایتونو کې یو شمېر سرتیرې له پوځي زده کړو فارغ شول

په ختيځ کې د سېلاب قول اردو له خوا د سیمه ییزې اردو ۴۳۵ سرتېرو په ننګرهار کې د ملکي هوایي ډګر د ساتنې او د کوټ، اچین او دُربابا ولسوالیو د امنیت د خوندیتوب په موخه دنده پيل کړه.
چارواکي وايي چې دغه سرتېري د افغان روزونکو له لوري له کابو دوه میاشتنیو زده کړو وروسته فارغ شول.
د ۲۰۱ سېلاب قول اردو قوماندان برید جنرال عبدالجبار وفا په دې اړه جوړه شوې غونډې کې وویل چې دغه پوځیان په مسلکي ډول روزل شوي او په ټاکل شویو سیمو کې به دنده ترسره کړي.
نوموړي همداراز ډاډ ورکړ چې دوی به د ملي اردو له بشپړو امکاناتو او ملاتړه برخمن وي .
د ننګرهار د والي مرستیال ببرک میاخېل وویل چې فارغ شویو پوځیانو تر دې وړاندې د دغه ولایت په ولسوالیو کې د سیمه ییزو پولیسو په توګه دندې ترسره کوله چې د سیمه ییزې اردو په لیکو کې جذب او له زده کړو وروسته به ژر په خپلو ولسوالیو کې دندې ترسره کړي .
په ختیځ کې د ولسي ملاتړ پروګرام مشر سیدالرحمن مومند ډاډ ورکړ چې د سیمې خلک به له دغو ځواکونو سره بشپړه همکاري کوي او همداراز یې د قول اردو له خوا د دوی په پوره ملاتړ کولو ټینګار وکړ.
فارغ شوي سرتیري تسنیم یار مومند د زده کړو په اړه خوښي وښوده، هغه له نورو ځوانانو وغوښتل چې د امنیتي ځواکونو په لیکو کې د دندې ترڅنګ هېواد ته په صادقانه ډول د خدمت ژمنه وکړي.
د ننګرهار په ګڼ شمېر ولسوالیو کې دمګړۍ د سیمه ییزې اردو ځواکونه ګومارل شوي، چې له نويو فارغ شویو سرتېرو څخه به نیمایي يې د هوایې ډګر د ساتنې چارې مخ ته بیايي او پاتې نور د کوټ، اچین او دُربابا ولسوالیو د امنیت د خوندیتوب په موخه استول کېږي.
له بلې خوا، په کونړ ولایت کې هم د سیمه ییزې اردو په چوکاټ کې ۱۸۰ سرتېري له زده کړو فارغ شول.
دغو سرتېرو له دې مخکې د سیمه ییزو پولیسو په لیکو فعالیت کاوه چې اوس د ۲۰۱ سېلاب قول اردو له خوا د سیمه ییزې اردو په چوکاټ کې له پوځي زده کړو فارغ شول.
د دوېمې پلې لوا قوماندان جنرال رحم دل وایي چې دغه پوځیان به په خاص کونړ، څوکۍ، نرنګ او مرورې ولسوالیو کې ځای پر ځای شي. د کونړ والي محمد اقبال سعید وویل چې سیمه ییزو پولیسو د ولسونو په همکارۍ مهم رول لوبولی چې د سیمه ییزې اردو په چوکاټ کې به ددغو سرتېرو لپاره لازیاتې آسانتیاوې برابرې شي.
په دغو مراسمو کې دیني عالم مولوي نجیب الله حقیار هم ددغو ځواکونو د هڅو ستاینه وکړه.