په کندهار کی یو شمېر تداوي شوي معتادین او د هغوۍ کورنۍ ادعا کوي چی د روږدو کسانو د درملنی په ځینو مرکزونو کی د نشه یی توکو د مخنیوی پرځای، ناروغانو ته د دغو توکو د رسولو او پلور زمنیه برابره شوې ده.
د کندهار اوسېدونکۍ ګل احمد (مستعار) وايي چی څه موده مخکې د کندهار د معتادينو په روغتون کې درې میاشتې تر درملنې لاندې و.
هغه وایي، تمه یې دا وه چی له درې میاشتنۍ درملنې وروسته به له نشه یې توکو خلاصون ومومي، خو دده په خبره، د درملنې په مرکز کی د نشه یی توکو شتون د ناروغانو د رغیدو پر بهیر منفي اغېز کړی دی.
عزام الله (مستعار)، یو بل ځوان چی تازه د درملنې له مرکزه رخصت شوی دی، وايي چی څو ځله یې مسوولانو ته په روغتون کې د نشه یی توکو د شتون په تړاو شکایت کړی، خو دده په خبره، د هغه شکايتونو ته پاملرنه نه ده شوې.
د درملنې په مرکزونو کې څه تېرېږي؟
۸صبح د دې راپور لپاره له ۱۲ پخوانیو ناروغانو، د هغوی له کورنیو او نورو سرچينو سره خبرې کړې دي. له دغو کسانو پنځو تنو ادعا کړې چې د نشه يي توکو د درملنې په مرکزونو کې د درملنې پر مهال ورته نشهیي توکي ورکړل شوي یا د پېرلو زمینه ورته برابره شوې ده. دوی وایي، په ځینو روغتیایي مرکزونو کې د کاروکوونکو له لورې ناروغانو ته د نشه يي توکو د رسیدو او یا په پټه د پېر او پلور زمینه برابره شوې ده.
ایا نشهیي توکی روغتیایي مرکزونو ته لېږدول کېږي؟
سرچینه ادعا کوی چی ځینی کسان د ناروغانو د پایوازانو په توګه د روږدو مرکزونو ته وړل کیږي او له دې لاری ناروغانو ته نشه یی توکي رسوي. د سرچینی په وینا، داسی ثبوتونه هم شته چی ښیې د مرکزونو دننه ځینې مسوول کسان یا کارکوونکې د نشه یی توکو د پلور په اړه معلومات لري او یا پرې سترګی پټوي.
د طالبانو د چارواکو په اړه ادعاوې
بله سرچينه، چې نه غواړي نوم یې خپور شي، ادعا کوي چی د طالبانو ځينې لوړ پوړې نظامې چارواکې د نشه یی توکو په پېر او پلور کی ښکېل دی. د سرچینی په خبره، دغه کسان د کندهار، زابل، هلمند او ارزګان په امنیه قومندانیو کی حضور لري او ځینې یې د طالبانو د کورنیو چارو وزارت په لوړو بستونو کی هم دندې لري.
دا سرچینه په کندهار کی د (فضل الدین) او( محمد انور) په نومونو د دوو کسانو یادونه کوي او ادعا کوی چی دغه کسان په کابل او ولایتونو کی د نشه یی توکو، په ځانګړی ډول د (ټابلیټ کا) او نورو موادو په برخه کې فعالیت لری. د دې سرچینی په وینا، هره ورځ د دغو کسانو له شبکې په زرګونه نشه یی ګولۍ پلورل کیږی.
۸صبح په خپلواکه توګه ونه شوای کړای چی د دې ادعاو کره والی تائید کړی.
د نشه توکو په تور د خلکو نیول
د دغه راپور په لړ کې ۸صبح له هغو کورنیو سره هم خبرې کړې چې ادعا کوي خپلوان یې د نشهیي توکو په تړاو له کافي شواهدو پرته نیول شوي دي.
په کندهار کې د یو بل کس کورنۍ وایي، هغه د ۱۴۰۴ کال په زمري میاشت کې ونيول شو.
د ده د پلار په خبره ، چی زوی يې له هغو کسانو سره ناسته ولاړه لرله چي د طالبانو د چارواکو خپلوان وو، خو یوازی دده زوی نیول شوی او هغه کسان چی له نوموړې سره یې ناسته ولاړه لرله، لا هم په خپلو کورنو کې دي.
کورنۍ: د درملنې مرکزونه باید د روږدېدو د مخنیوی ځایونه وي
د کندهار او د سوېلي زون په یو شمېر نورو سیمو کی د معتادینو کورنۍ اندیښنه لري چی که د معتادینو د درملنی مرکزونه د درملنی او سالم ژوند ته د بیرته ستنیدو پر ځای د نشه یی موادو د پېر او پلور پر مرکزونو بدل شي، د درملنی بهیر به له جدی ستونزو سره مخ شي.
د دوی په خبره، یو کس چی د نشه یی توکو د پریښودو لپاره د درملنې مرکز ته سپارل کیږی، باید له نشه یی توکو په بشپړه توګه لېرې وساتل شی، خو که دغه مواد په هماغه مرکز کی ورته رسیږي، د درملنی اصلی موخه له منځه ځي.
د کندهار اوسیدونکی وایی، د داسی مرکزونو فعالیت باید په منظم ډول وڅارل شی او د ناروغانو د درملنې ترڅنګ باید دغو مرکزونو ته د نشه يي توکو د احتمالي لېږد او د هغو د پلور مخه ونیول شي.
د روږدو کسانو د درملنې پر ځای، بېرته نشه یی توکو ته د هغوی د هڅولو دغه ادعاوې داسی مهال کیږی چی طالبان په هیواد کی د نشه یی توکو پر وړاندی د مبارزې او د روږدو کسانو د راټولولو او درملنی په اړه پراخ تبلیغات کوي.
