۸صبح، ننګرهار: د ننګرهار سیمهییزې سرچینې وايي چې په دغه ولایت کې د پاکستاني طالبانو (ټيټيپي) یو پټنځای د هوايي برید هدف ګرځېدلی دی.
سرچینو ۸صبح ورځپاڼې ته ویلي چې دا برید تېرهشپه د زمري پر ۲۰مه د ننګرهار د مومندرې ولسوالۍ په «باسول» سیمه کې شوی دی.
د سرچينو په وینا، له دغه بريد وروسته په سيمه کې د امبولانسونو غږ هم اورېدل شوى دى.
يوې سرچينې د کره شمېرې له ورکولو پرته زياته کړې چې په دې بريد کې يو شمېر کسان وژل شوي او ټپيان دي.
ورته مهال، په ننګرهار کې د طالبانو یو ویاند په واټساپ ګروپ کې د دغې ډلې له غړو غوښتي چې په مومندرې کې د ټيټيپي وسلهوالو پر پټنځای د برید په تړاو له نظر ورکول ډډه وکړي.
هغه زیاته کړې: «ملګرو، که په مومندرې کې کومه ستونزه پېښه شوه باید په تمه شو ترڅو د مشرانو له خوا رسمي خبر خپور شي.»
له دې ټولو سره سره، د ننګرهار د طالبانو امنيه قوماندانۍ وياند عبدالبصير زابلي وايي چې د دغې ډلې جنګياليو په مومندرې ولسوالۍ کې چاودېدونکي توکي چاودولي او هېڅ هوايي بريد نه دى شوى.
بل خوا يوې سرچينې د نوم نه ښودلو په شرط ۸صبح ورځپاڼې ته ویلي چې تېرهشپه (د زمري ۲۰مه) بې پيلوټه الوتکو د ننګرهار په مومندرې ولسوالۍ او د کونړ په سرکاڼو کې شاوخوا دوه ساعته ګزمې وکړې.
تر اوسه څرګنده نه ده چې دا الوتکې له کوم هېواده د افغانستان هوايي حریم ته دننه شوې دي.
دا په داسې حال کې ده چې تر دې دمخه هم د هېواد په سوېلي او ختيځو ولايتونو کې د پاکستان دولت د مخالفو وسلهوالو پر پټنځايونو هوايي بريدونه شوي دي.
که څه هم طالبانو او اسلاماباد په رسمي ډول د دې بریدونو په تړاو څه نه دي ویلي؛ خو پاکستاني چارواکو تر دې دمخه د طالبانو تر واک لاندې افغانستان کې پر ټيټيپي وسلهوالو د دا ډول بریدونو د ترسره کولو خبرداری ورکړی و.
