ارګ د صرافانو د کاربندیز د پای ته رسولو خبر ورکړ

د ولسمشر د ویاند مرستیال وویل چې د هېواد د صرافانو یو شمېر استازو له ولسمشر سره په کتنه کې خپل کاربندیز پای ته رسولی دی.
دواخان مینه پال زیاته کړې چې د صرافانو استازو د کب په درېيمه نېټه له ولسمشر غني سره په کتنه کې د کار بندیز د پای ته رسولو اعلان وکړ، ځکه حکومت د یوې اونۍ په اوږدو کې د صرافانو د ستونزو ارزونه کوي او حل لارې ورته لټوي.
د هېواد صرافانو د سلواغې په اتلسمه نېټه د اعتراض په توګه کاربندیز وکړ. دوی دا پرېکړه د کابل د صرافانو په بازار شهزاده سرای کې اعلان کړه. له هغې وروسته په کابل او ځینو ولایتونو کې صرافانو اعتراضي غونډې وکړې.
د هېواد د صرافانو کاربندیز، شرکت ته د صرافیو د بدلولو په اړه د افغانستان بانګ د پرېکړې په غبرګون کې شوی و.
د افغانستان بانګ په دې وروستیو کې شرکت ته د صرافیو د بدلولو په اړه پرېکړه کړې ده. ددغې پرېکړې له مخې، شخصي صرافۍ د پیسو په شرکتونو بدلېږي او وروسته ورته د کار جواز ورکول کېږي.
د افغانستان بانګ وايي چې دا پرېکړه د پیسو له سپینولو او ترهګرۍ له تمویل سره د مبارزې په موخه له خپلو نړیوالو شریکانو سره د دغه بانګ د ژمنو پر اساس شوې ده. د افغانستان بانګ وېلي چې شرکت ته د صرافیو او پیسو د خدماتو د وړاندې کوونکو د حقوقي جوړښت بدلون آسانه بهیر دی. خو صرافانو وېلي وو چې د افغانستان په اوسنیو شرایطو کې دا پرېکړه د عملي کېدو وړ نه ده.