ارګ: د بهـرنيو ځـواکـونـو تلفـات پـه دې دلـيل صفـر شوي چې طالبان د افغانانو په وړاندې جنګېږي

ولسمشرۍ ماڼۍ د امريکا د بهرنيو چارو وزير مايک پمپيو د خبرو په غبرګون کې ويلي دي: «اوس طالبان د افغانستان د خلکو پر وړاندې» جګړه کوي. د امريکا د بهرنيو چارو وزير په خپلو تازه څرګندونو کې ويلي چې په تېر يوه کال په افغانستان کې هېڅ امريکايي پوځ نه دی وژل شوی.
د ولسمشر مرستيال وياند دواخان مينه پال د مرغومي په څوارلسمه وويل چې د بهرنيو ځواکونو تلفات په دې سبب صفر شوي چې امنيتي ځواکونه په يواځې توګه د جګړې مشري کوي.
د نوموړي په وينا طالبان اوس د افغانانو او حکومت پر وړاندې جنګېږي او د خلکو تلفات په دې جګړه کې ډېر لوړ دي.
د امريکا د بهرنيو چارو وزير مايک پمپيو شنبه ماښام په خپل يو ټوېټ کې اعلان وکړ چې د تېر يوه کال په اوږدو کې په افغانستان کې هېڅ امريکايي سرتېری نه دی وژل شوی.
پمپيو د سولې مذاکراتو ته په اشارې سره ويلي دي چې افغانان په خبرواترو بوخت دي چې هوکړې ته ورسېږي.
په ۲۰۱۹ زېږديز کال کې په افغانستان کې د امريکايي پوځيانو د تلفاتو شمېر ۲۰ تنه اعلان شوي و.
طالبانو د دې هوکړه ليک له لاسليکولو وروسته د بهرنيو ځواکونو پر وړاندې خپل بريدونه ودرول، خو پر افغان امنیتي ځواکونو لا هم د دوی بريدونه دوام لري.
له دې مخکې د ملي امنيت عمومي رييس، احمدضيا سراج اعلان وکړ چې د تېر يو کال په اوږدو کې په هېودا کې د پوځي او ملکي اهدافو په موخه ۱۸ زره او ۲۰۰ ترهګريز بريدونه ترسره شوي چې ۹۹ سلنه دغه بریدونه د طالبانو ډلې له خوا شوي دي.
سراج د دغو پېښو تلفات په مشخص ډول اعلان نه کړل، خو ويې ويل چې په دغو پېښو کې تر ډېره ملکي وګړي وژل شوي دي.