د عزیزي بانک یو شمېر مشتریان وايي چې دغه بانک د حساب پرانیستلو پر مهال دوی د ځینو شرایطو په اړه په څرګند ډول نه دي خبر کړي. دوی ادعا کوي چې له بانکي خدمتونو تر استفادې وروسته د پیسو ایستلو له امله د پیسو او د بانکي خدمتونو د میاشتنیو لګښتونو له ګرځولو خبر شوي دي. دغه مشتریان له بانکونو غواړي چې د خدمتونو په بدل کې د هر ډول لګښت له اخیستو مخې دوی په څرګنده توګه خبر کړي، څو وکړای شي د خپلو پیسو د مدیریت او لګښت په اړه لا باخبره پرېکړه وکړي. مشتریان همداراز وايي چې د دغه بانک په ځینو څانګو کې هغه کسان چې د بانکي حسابونو د پرانیستلو مسوولیت لري، مشتریانو ته د حساب د شرایطو او جزیاتو په تشریح کې پاتې راځي. د هغوی په وینا، همدا موضوع د دې لامل کېږي چې د حساب له پرانیستلو وروسته د مشتریانو لپاره جدي پوښتنې او ابهامونه رامنځته شي او هغوی هم دغو پوښتنو ته روښانه ځواب ترلاسه نه کړای شي.
د بانکونو، په ځانګړې توګه د عزیزي بانک له خوا د مشتریانو د تعامل او لګښتونو د اخیستو په اړه د شکایتونو په لړ کې یو شمېر مشتریان د میاشتنیو لګښتونو او له ATM ماشینونو د استفادې د کمېشن له اخیستو شکایت کوي. دوی ټینګار کوي چې د حساب له پرانیستلو مخکې د بانکي خدمتونو اړوند شرایط او لګښتونه په روښانه او رڼه توګه ورته نه دي تشریح شوي.
د عزیزي بانک یو مشتری چې نه غواړي نوم یې په راپور کې یاد شي، وايي چې د ډالرو او افغانیو د حسابونو د پرانیستلو پر مهال د بانک کارکوونکو یوازې هغه ته د افغانیو له حسابه د میاشتنیو ۲۵ افغانۍ او له ډالري حسابه د ۷۰ سېنټو د کسر په اړه معلومات ورکړي، خو د حساب د تړلو لپاره د شپږ میاشتني محدودیت او د اړتیا وړ لږ تر لږه موجودۍ په اړه یې هېڅ معلومات نه دي ورکړي. د هغه په وینا، کله چې د خپل حساب د تړلو لپاره د عزیزي بانک څانګې ته ورغلی، د بانک کارکوونکي ورته ویلي چې د نویو مقرراتو له مخې، حساب تر شپږو میاشتو مخکې نه شي تړل کېدای او مشتری باید په خپل ډالري حساب کې لږ تر لږه ۱۰۰ ډالر او د افغانیو په حساب کې زر افغانۍ ولري.
دغه مشتری وايي:«په هغه ورځ چې مې حساب پرانیست، هېچا راته ونه ویل چې تر شپږو میاشتو پورې خپل حساب نه شم تړلی یا باید په حساب کې مشخصې پیسې ولرم. کله چې د حساب د تړلو لپاره ورغلم، تازه له دې موضوع خبر شوم.» هغه زیاتوي چې د دې موضوع د تعقیب لپاره دوه ځله د عزیزي بانک څانګې ته ورغلی، خو د بانک کارکوونکو ورته ویلي چې دغه مقررات تازه عملي شوي او هغوی په دې برخه کې هېڅ نه شي کولای.
د عزیزي بانک یو شمېر نور مشتریان هم د دغه بانک له ATM ماشینونو د پیسو ایستلو په بدل کې د کمېشن له کسره شکایت کوي. د دوی د ادعا له مخې، د میاشتنیو ۲۵ افغانیو پر ګرځولو سربېره، هر ځل چې دوی د ATM له لارې له خپل حسابه پیسې وباسي، ۲۵ افغانۍ نورې هم ترې کسرکېږي. دغه مشتریان د بانک دا اقدام ناعادلانه بولي او غواړي چې د دې کار مخه ونیول شي یا د حساب له پرانیستلو مخکې د دغو لګښتونو په اړه شفاف معلومات ورکړل شي.
یو مشتری وايي چې د پیسو له ایستلو مخکې یې د خپل حساب موجودي کتلې او له پیسو ایستلو وروسته پوه شوی چې ۲۵ افغانۍ یې له حسابه د کمېشن په توګه کسر شوې دي. د هغه په وینا، کله چې بانک ته ورغلی، د بانک یوه کارکوونکي ورته ویلي چې د ATM له ماشینه د هر ځل استفادې په بدل کې ۲۵ افغانۍ کمېشن اخیستل کېږي.
دغه مشتري وايي: «کله چې مې حساب پرانیست، په دې اړه هېڅ معلومات را نه کړل شول چې هر ځل له ATM څخه پیسې واخلم، ۲۵ افغانۍ کمېشن به ترې اخیستل کېږي. د پیسو له اخیستو وروسته، پوه شوم چې له حسابه مې یوه اندازه پیسې کسر شوې دي.» هغه زیاتوي چې د عزیزي بانک له څو نورو مشتریانو تر پوښتنې وروسته پوه شوی چې هغوی هم له ورته ستونزې سره مخ دي.
د دغه مشتری په وینا، عزیزي بانک په وروستیو ورځو کې له ATM ماشینونو د پیسو ایستلو کمېشن له ۲۵ افغانیو پنځو افغانیو ته راکم کړی دی. هغه وايي، دا بدلون شاوخوا یوه اوونۍ وړاندې عملي شوی، خو مشتریان د حساب پرانیستلو پر مهال له دغه ډول لګښته نه وو خبر شوي. دغه مشتری زیاتوي چې د حساب پرانیستلو پر مهال د بانکي لګښتونو په اړه د معلوماتو نشتوالی د دې لامل کېږي چې مشتریان یوازې له خدمتونو تر استفادې وروسته د واقعي لګښتونو له اندازې خبر شي.
مشتریان وايي، بانکونه باید د حساب له پرانیستلو وړاندې د بانکي خدمتونو ټول شرایط، محدودیتونه او اړوند لګښتونه، د ATM ماشینونو له لارې د پیسو ایستلو کمېشن، د حساب د ساتنې لګښت او د حساب د تړلو شرایط، په روښانه او لیکلې بڼه مشتریانو ته تشریح کړي. هغوی زیاتوي چې د بانکي خدمتونو په بدل کې د لګښت اخیستل هغه مهال د منلو وړ دي چې مشتری د خدمت له کارولو وړاندې د لګښت له اندازې او شرایطو خبر وي او بانکونه د هغو پیسو له کسر کولو ډډه وکړي چې مشتری یې له مخکې په اړه معلومات نه لري.
تر دې وړاندې هم سرچینو ادعا کړې وه چې عزیزي بانک هره میاشت د خپلو ټولو مشتریانو له حسابونو د «حساب د ساتنې د فیس» (Account Maintenance Fee) په نوم یوه اندازه پیسې کسر کوي. د سرچینو په وینا، دغه پیسې د حساب د موجودۍ له اندازې او د مشتریانو له مخکیني خبرتیا پرته کسرکېږي.
د طالبانو تر ادارې لاندې د افغانستان بانک اعلان کړی چې اوس مهال په ټول هېواد کې ۱۲ بانکونه فعالیت کوي چې درې دولتي بانکونه، اووه خصوصي بانکونه او د بهرنیو بانکونو دوه استازولۍ پکې شاملې دي. د دغه بانک د شمېرو له مخې، د هېواد شاوخوا ۱۵ سلنه وګړي بانکي حساب او مالي خدمتونو ته لاسرسی لري.
