ځينې ویډیوګانې ۸صبح ورځپاڼې ته استول شوې چې پکې ښکاري یوه ښځه د خپل مېړه له خوا په بوږنوونکې بڼه وژل شوې ده. په یوې ویډیو کې د یوې ښځې جسد ښکاري چې په بدن کې یې د شکنجې نښې لیدل کېږي. د دغې ښځې د وژلو ویډيو دومره بوږنونکې ده چې د خپرولو نه ده. سرچینې ادعا کوي چې مېړه یې هغه په اور ګرم شوي سیخ شکنجه کړې ده. همدارنګه، سرچینې وايي چې دا ښځه د خپلو ماشومانو په مخکې د مېړه له خوا شکنجه شوې او له سختو وهلو ټکولو وروسته یې ساه ورکړې ده.
د نوریې په نوم د یوې ښځې ویډیوګانې چې ۸صبح ورځپاڼې ته استول شوې، له یوې بوږنوونکې وژنې پرده پورته کوي. په دغو ویډیوګانو کې لیدل کېږي چې د دغې ښځې د بدن ځينې برخې د شکنجې او وهلو ټکولو له کبله شنې اوښتې او په بدن کې یې د شکنجې نښې لیدل کېږي. د دغو ویډیوګانو تر شا د نوریې د خپلوانو او ښځو د چیغو غږونه هم اورېدل کېږي چې ژاړي.
سرچینې وايي چې دا ښځه نوریه نومېده او شاوخوا ۱۴ ورځې مخکې د غور د تیوره ولسوالۍ په «تنګي سرپنک» کلي کې وژل شوې ده. د سرچینو په خبره، نوریه ۳۲ کلنه وه او د مېړه له سختو شکنجو وروسته یې ساه ورکړې ده.
د سرچینو په وینا، نوریه د غور د پسابند ولسوالۍ د «خواجه» کلي اصلي اوسېدونکې وه. هغې لس کاله مخکې واده کړی و او ترې درې لوڼې او یو هلک پاتې دی. د سرچینو د ادعا له مخې، د نوریې مېړه تازه له ایرانه راغلی و.
سرچینې وايي چې دا وژنه د نوریې او خواښې ترمنځ له یوه لفظي شخړې وروسته شوې ده. د سرچینو د ادعا له مخې، د نوریې مېړه هغه د خپلو ماشومانو په مخکې شکنجه کړې چې په پایله کې یې ساه ورکړې ده.
د سرچینو د ادعا له مخې، د نوریې جسد یوه شپه او ورځ د خپلو ماشومانو په مخکې پروت و او د هغې ورځې په سبا په کلي کې د جنازې له لمونځ وروسته یې مېړه پر وژنې اعتراف وکړ او ځان یې طالبانو ته وسپاره.
دا په داسې حال کې ده چې څو میاشتې مخکې د فرزانې په نوم یوه بله ښځه هم د غور په پسابند ولسوالۍ کې د خپل مېړه له خوا شکنجه او د مېړه د بلې ښځې د زوی له خوا وژل شوې وه. هغه مهال سرچینو ۸صبح ورځپاڼې ته ویلي و چې فرزانه څو وارې د خپل مېړه او د مېړه د کورنۍ د غړو له لوري شکنجه شوې وه. ډاکټرانو هم هغه مهال تایید کړې وه چې د هغې پر ستوني د رسۍ په وسیله د زندۍ کولو او ان د سوځېدو نښې لیدل شوې وې.
په غور کې د ښځو د وژنو په دوام، په ۱۴۰۳ کال کې یوه بله ښځه هم د پسابند ولسوالۍ د «دو برار شیخها» په سیمه کې د خپل مېړه له خوا وژل شوې وه. همداراز، د ۱۴۰۲ کال د غويي پر درېیمه، د غور د پسابند ولسوالۍ په «سنګان» سیمه کې یوه ښځه د خپل مېړه له خوا وژل شوې وه. په یوه بله پېښه کې بیا د غور مرکز فیروزکوه ښار اړوند سیمه کې یوه ښځه په مرموز ډول وژل شوې وه.
په ۱۴۰۲ کال کې په غور کې یو طالب چې غوښتل یې پر یوې پیغلې نجلۍ جنسي تېری وکړي خو د هغې له مقاومت سره مخ شو، ووژل شوه. په غور کې باوري سرچینو ویلي و چې د وژل شوې نجلۍ نوم زرمینه وه او د مرکز فیروزکوه ښار د «صاد سیاه» په سیمه کې د خپل پلار په کور کې په ډزو وژل شوې ده. د سیمهییزو سرچینو د څرګندونو له مخې، هغه طالب چې د جنسي تېري په هڅه کې له ناکامېدو وروسته یې زرمینه وژلې وه، عبدالقدوس نومېده.
له دې مخکې د ملګرو ملتونو د بشري حقونو ځانګړي راپور ورکوونکي ریچارډ بېنېټ ویلي و چې طالبان له خپل قضايي نظامه د ښځو او نجونو د ځپلو لپاره د یوې وسیلې په توګه کار اخلي. د نوموړي په خبره، طالبانو د تېر حکومت قضايي دستګاه بدله کړې، د نارینه قاضیانو اکثریت او ټولې ښځینه قاضیانې یې له دندو ګوښه کړې او پر ځای یې خپل کسان ګومارلي دي.
د ملګرو ملتونو د ښځو څانګې د طالبانو واکمنۍ د یوه کال له پوره کېدو وروسته په خپل راپور کې ویلي و چې په افغانستان کې د ښځو او نجونو پر وړاندې تاوتریخوالی پراخ دی او نږدې له هرو لسو ښځو نهه یې د خپل ژوند په اوږدو کې لږ تر لږه یو ډول تاوتریخوالی د ژوند د شریک له خوا تجربه کړی دی. دغه بنسټ د یوناما په حواله راپور ورکړی و چې د ۲۰۲۱ کال د اګست او د ۲۰۲۲ کال د جون میاشتو ترمنځ یې د ښځو او نجونو پر وړاندې د تاوتریخوالي څه باندې ۸۷ پېښې ثبت کړې دي.
دغه راز، په افغانستان کې د ملګرو ملتونو مرستندویه پلاوي (یوناما) په تېرو پنځو کالو کې په خپلو ګڼو راپورونو کې د کورني تاوتریخوالي له امله د ښځو د وژلو په اړه معلومات خپاره کړې دي. په راپورونو کې راغلي چې د ښځو او نجونو جبري ودونه، جنسي تېری او کورنی تاوتریخوالی زیات شوی او د ښځو د ملاتړو میکانیزمونو او قوانینو لغوه کېدو، وضعیت نور هم سخت کړی دی.
