۸صبح، کابل: په هلمند کې د طالبانو د اطلاعاتو او کلتور رییس حافظ عبدالباري راشد هلمندي ویلي، چې پر دغه ولایت د پاکستان په هوايي بریدونو کې څلور ښځې او ماشومان وژل شوي او اته نور ملکي وګړي ټپیان شوي دي.
هلمندي ویلي، چې دغه بریدونه پنجشنبه د تلې پر ۹مه، سهار شاوخوا ۳:۳۰ بجې د ګرمسېر ولسوالۍ د صفار سیمې په درېیو برخو کې شوي دي.
د هغه په وینا، په دغو بریدونو کې دوه کورونه او د اختر د لمانځه د ادا کولو یو ځای په نښه شوي دي.
دا په داسې حال کې ده چې د پاکستان د اطلاعاتو وزارت وايي، دغه بریدونه د «کره معلوماتو» پر بنسټ شوي او په پایله کې یې ۲۲ «ترهګر» وژل شوي دي.
پاکستان ویلي، چې د دغه هېواد ځواکونو د «غضب للحق» عملیاتو په لړ کې په افغانستان کې د «فتنة الخوارج» او «فتنة الهندستان» په نومونو د ډلو او د هغوی د اړوندو کسانو دوه پټنځایونه په هوايي بریدونو کې په نښه کړي دي؛ خو طالبان وايي چې په دغو بریدونو کې ملکي وګړي وژل شوي دي.
پاکستان په ځلونو طالبان تورن کړي چې وسلهوالو ډلو ته پناه ورکوي؛ خو طالبان دغه تور ردوي او وايي، چې په پاکستان کې ناامني د دغه هېواد کورنۍ ستونزه ده.
