۸صبح، کابل: د پاکستان د اطلاعاتو وزارت اعلان کړی چې د دغه هېواد ځواکونو د «غضب للحق» عملیاتو په لړ کې په افغانستان کې د « فتنهالخوارج » او « فتنهالهندستان » په نوم د ډلو او د هغوی د ډلګیو پر دوو پټنځایونو هوایي بریدونه کړي دی.
دغه وزارت پنجشنبه د تلې پر ۹مه، په یوه اعلامیه کې ویلي چې دا بریدونه د «موثقو معلوماتو» پر بنسټ پر دوو سیمو شوي چې په ترڅ کې یې ۲۲ «ترهګر» وژل شوي دي.
په اعلامیه کې راغلي چې په دغو بریدونو کې ډېره اندازه وسلې او مهمات هم له منځه وړل شوي دي.
دا په داسې حال کې ده چې د طالبانو چارواکو ویلي د دغو بریدونو قربانیان د ښځو او ماشومانو په ګډون ملکیان دي.
پاکستان د پنجشنبې پر سهار په کونړ او هلمند ولایتونو کې پر ځينو سیمو هوایي بریدونه کړي دي.
د طالبانو د چارواکو په وینا، په دغو بریدونو کې ۹ ملکیان وژل شوي او ۱۱ نور ټپیان شوي دي.
