اسراییلو اعلان کړی چې د غزې د اوربند په لومړي پړاو کې د ۱۷۰۰ فلسطینیانو د خوشې کولو لپاره چمتووالی نیسي.
د اسراییل ټایمز ورځپاڼې جمعه د جنورۍ پر ۱۷مه، راپور ورکړ چې تل ابیب به دا بندیان په راتلونکو ورځو کې خوشې کړي.
د راپور له مخې، د دغو بندیانو له ډلې له ۲۵۰ تر ۳۰۰ پورې کسان په عمري بند محکوم شوي وو.
په راپور کې راغلي چې سور صلیب د هغوی په خوشې کولو کې هیڅ رول نه لري.
تل ابیب دغه راز یادونه کړې چې دوی به نور ۱۰۰۰ بندیان هم خوشې کړي.
د راپور له مخې، دا بندیان د غزې اوسېدونکي دي چې د ۲۰۲۳ کال د اکټوبر له میاشتې وروسته، د اسراییلي پوځ لخوا نیول شوي وو.
له دې سره هممهاله، د اسراییلو امنیتي کابینې هم اعلان وکړ چې په غزه کې یې د اوربند له هوکړې سره موافقه کړې ده.
تر دې وړاندې فاکس نیوز راپور ورکړی و چې د اسراییلو او حماس ترمنځ د غزې د اوربند هوکړه په رسمي ډول د قطر په دوحه کې د مذاکره کوونکو لخوا لاسلیک شوې ده.
ویل شوي چې دا هوکړه به د امریکا، مصر او قطر له خوا څارل کیږي.
