۸صبح، کابل: د طالبانو تر واک لاندې د افغانستان بانک یو ځل بیا اعلان کړی چې په هېواد کې د انلاین صرافیو فعالیت منع دی.
نوموړي بانک دوشنبه د وري پر ۲۰مه په یوې خپرې کړې خبرتیا کې لیکلي چې تر اوسه یې کوم شخص یا شرکت ته د انلاین صرافۍ د فعالیت جواز ورکړی نه دی.
یاد بانک یادونه کړې چې له سرغړونکو سره به قانوني چلن وشي.
د افغانستان بانک یادونه کړې چې خلک دې د دې ډول معاملاتو د خطرونو، زیانونو او وروستیو مسوولیتونو ته په پام، له انلاین صرافیو سره د معاملاتو له ترسراوي ډډه وکړي.
د خبرتیا په حواله، دا موضوع د طالبانو له کشفي او امنیتي ادارو سره هم شریکه شوې ده.
له دې وړاندې د افغانستان بانک په هېواد کې د ډيجیتلي اسعارو په راکړې ورکړې بندیز لګولی و.
له دغه امر وروسته، په هرات کې څو صرافۍ وتړل شوې او په بادغیس کې هم د ډيجیتلي اسعارو په راکړه ورکړه بندیز ولګېده.
طالبان باوري دي چې د ډیجیتلي اسعارو راکړه ورکړه په اسلامي شریعت کې «حرامه» او قمار ده.