۸صبح، کابل: د طالبانو تر کنټرول لاندې د افغانستان د برېښنا شرکت د ټاپ پروژې له رییس مراد ارتېکوف سره د دغه شرکت د چارواکو د کتنې خبر ورکړی دی.
دغې ادارې شنبه د وږي پر ۲۸مه، ویلي چې په دې کتنه کې د ۵۰۰ کیلوولټه برېښنا د لېږد پروژې د پرمختګ او د هغې د پلي کېدو د بهیر په اړه خبرې شوې دي.
د افغانستان برېښنا شرکت زیاته کړې چې دا پروژه له ترکمنستانه افغانستان ته د برېښنا د ډېرې انرژۍ د لېږد زمینه برابروي.
همدا راز، په دې ناسته کې د هرات ولایت د نورالجهاد سب سټېشن د بشپړېدو، د بادغیس ولایت بالامرغاب ولسوالۍ ته د برېښنا انرژۍ د رسولو او د یو شمېر نورو پروژو د عملي کولو په تړاو هم بحث شوی دی.
افغانستان د خپلې اړتیا وړ برېښنا یوه لویه برخه له ګاونډیو هېوادونو واردوي او ترکمنستان د دغه هېواد د برېښنا د تامین یو له مهمو سرچینو دی.
