۸صبح، کابل: په کابل کې د «دعوت» خصوصي پوهنتون مسوولانو د طالبانو د لوړو زدهکړو وزارت له خوا د نوي مشرتابه پلاوي د ټاکلو په اعتراض کې دغه پوهنتون تړلی دی.
دغه پوهنتون شنبه د وږي پر ۲۸مه، په یوه خبرپاڼه کې د طالبانو له خوا د دغه پلاوي ګومارنه غندلې ده.
دعوت پوهنتون زیاته کړې چې دا پلاوی د ادارې او پوهنتون د بنسټایښودونکو له موافقې پرته ګومارل شوی او د دغه تحصیلي بنسټ له نظره مشروعیت نه لري.
په خبرپاڼه کې راغلي چې طالبانو «د هیڅ موجه شرعي، قانوني او اداري دلیل له وړاندې کولو پرته» او د ادارې او موسسانو له رضایت پرته، دغه پوهنتون په خپله ولکه کې راوستی او نوی مشرتابه پلاوی یې ورته ګومارلی دی.
دعوت پوهنتون ویلي چې د دغه بنسټ د حقوقي او قانوني وضعیت تر روښانېدو پورې به د ۱۴۰۵ کال د وږي له ۲۹مې د دغه بنسټ ټول علمي، تدریسي او اداري فعالیتونه دریدلې وي.
د طالبانو د لوړو زدهکړو وزارت تر اوسه د دعوت پوهنتون لپاره د نوي مشرتابه پلاوي د ګومارلو او د دغې پرېکړې د لاملونو په اړه څه نه دي ویلي.
دا په داسې حال کې ده چې تر دې وړاندې دغې ډلې د «خاتمالنبیین» خصوصي پوهنتون فعالیت هم ودراوه.
