۸صبح، کابل: په ایران کې د کډوالو د لېږدونکي موټر او د سوند توکو د لېږدونکي موټر د ټکر له امله اووه افغان کډوال مړه شوي دي.
د «حالوش» بشري حقونو سازمان شنبه، د وږي پر ۲۸مه، راپور ورکړی چې دا پېښه د ایران په سیستان و بلوچستان ولایت کې د ایرانشهر–جکیګور پر لویه لاره شوې ده.
په دې پېښه کې ۹ نور افغان کډوال ټپیان شوي هم دي.
دغې ادارې زیاته کړې چې تر اوسه د دغې پېښې د مړو شویو او ټپیانو د هویت په اړه بشپړ معلومات نه دي خپاره شوي.
دا په داسې حال کې ده چې څو ورځې وړاندې هم د ایران په سراوان کې لږ تر لږه ۱۷ افغان کډوال د تندې له امله مړه شول.
