له افغانستانه د بهرنیو ځواکونو د وتلو پرېکړه او غبرګونونه

د امریکا ولسمشر جوبایډن د وري په ۲۵مه نېټه له افغانستانه د خپلو ځواکونو د ایستلو وخت اعلان کړ او وې وېل چې ددې وخت رارسېدلی، امریکا خپلې تر ټولو اوږدې جګړې ته د پای ټکی کېږدي او د مې میاشتې له لومړۍ نیټې له افغانستانه د امریکايي ځواکونو د ایستلو بهیر پیلوي. ناټو سازمان هم د امریکا پرېکړې ته په کتو له افغانستانه د ځواکونو د ایستلو اعلان وکړ. د ناټو سرمنشي ینس سټولټنبرګ په خبري ناسته کې ويلي چې د ناټو غړو هېوادونو له امریکا سره یو ځای افغانستان ته ځواکونه استولي په یوه وخت به یې وباسي.
په دې لړ کې د امریکا د بهرنیو چارو وزیر انتوني بلینکن د پنجشنبې په ورځ په ناڅاپي سفر کابل ته راغی او له ولسمشر غني او عبدالله عبدالله سره یې وکتل.
هغه له افغانستانه د امریکايي ځواکونو د وتلو په اړه ويلي چې د دوی د سرتېرو وتل د دواړو هېوادونو ترمنځ د ستراتېژیکو اړیکو د کمزوري کېدو په مانا نه دي او د امریکا دولت د افغانستان له دولت او خلکو سره پر خپلو ژمنو ولاړ دی.
ولسمشر غني هم له ترهګرۍ سره پر ګډې مبارزې ټینګار کړی او ويلي یې دي چې له افغانستانه د ځواکونو د ایستلو په اړه د امریکا پرېکړې ته درناوی لري او هڅه کوي چې له امریکا سره د لېږد په بهیر کې همکاري وکړي. ولسمشر ویلي چې افغان امنیتي او دفاعي ځواکونه په یوازې له خپل هېواده د دفاع وړتیا لري.
د ملي روغې جوړې د عالي شورا رییس هم وايي چې له افغانستانه د بهرنیو ځواکونو په وتلو سره له هېواده د نړیوالې ټولنې ملاتړ پای ته نه رسېږي. ولسي جرګې هم له افغانستانه د بهرنیو ځواکونو د وتلو په اړه اندېښنه څرګنده کړې او خبرداری یې ورکړی که بهرني ځواکونه له افغانستانه ووځي، ښايي یو ځل بیا کورنۍ جګړه پیل او افغانستان د نړیوالې ترهګرۍ په مرکز بدل شي.
اخوا، طالبانو بیا د مې په لومړۍ نېټه له افغانستانه د بهرنیو ځواکونو د نه وتلو په اړه خبرداری ورکړی او ټینګار یې کړی چې د بهرنیو ځواکونو د نه وتلو په غبرګون کې به د دوی پرخلاف خپل بریدونه پيل کړي.
په دې لړ کې، ټاکل شوې څو ورځې وروسته د ترکیې په استانبول کې د افغانستان په اړه غونډه جوړه شي چې د افغانستان د راتلونکي نظام او سولې د ټینګښت په اړه د لارې نقشه برابره کړي. خو طالبانو په دغه ناسته کې خپل ګډون رد کړی او ویلي یې دي ترڅو چې بهرني ځواکونه له افغانستانه نه وي وتلي د افغانستان په اړه ناستو کې به ګډون ونه کړي.
اوسنیو حالاتو ته په پام سره افغانانو ته په کار ده چې له دغه تاریخي او کم ساري فرصته په هېواد کې د تلپاتې سولې د ټینګښت لپاره ګټه پورته کړي. تېرو ترخو تجربو او ناخوالو ته کتو د یو بل منلو د اصل له مخې سره کښېني او په پوره اخلاص او صداقت مذاکرات وکړي او د افغانانو دردونو او کړاوونو ته نور د پای ټکی کېږدي.