د لاسي صنایعو یو شمېر صنعتکاران د خپلو محصولاتو د پلور د کمېدو او د بازار د سړېدو په اړه اندېښنه څرګندوي. دوی وايي، د لاسي صنایعو تولید ظرافت، مهارت او د پام وړ وخت او لګښت ته اړتیا لري؛ خو د مناسب بازار نشتوالي او د تقاضا کمېدو د پلور او بازارموندنې په برخه کې د دوی فعالیتونه له جدي ستونزو سره مخ کړي دي. د دوی په وینا، په تېرو کلونو کې د لاسي صنایعو محصولاتو په کوردننه او بهر د پام وړ پېرېدونکي لرل؛ خو په وروستیو کلونو کې د پېرېدونکو شمېر کم شوی دی.
صنعتکاران همداراز وايي چې په دې برخه کې فعالې ښځې په نندارتونونو کې د ګډون او حضور له محدودیتونو سره مخ دي؛ هغه محدودیتونه چې د دوی په باور، د محصولاتو د معرفي کولو او وړاندې کولو او نویو بازارونو ته د لاسرسي فرصتونه یې کم کړي دي.
د لاسي صنایعو د یوه کارغالي مسوول امید (مستعار نوم) وايي چې لاسي صنایع په ډېر ظرافت او زحمت تولیدېږي؛ خو په وروستیو کلونو کې د دغو محصولاتو د پلور بازار سوړ شوی دی. د هغه په وینا، صنعتکارانو تر دې وړاندې هم کورني او هم بهرني پېرېدونکي لرل.
د لاسي صنایعو د دغه کارغالي مسوول وايي: «تر دې وړاندې به مو بهرني فرمایشونه په انلاین بڼه ترلاسه کول او د خدماتي شرکتونو له لارې به مو پېرېدونکو ته استول؛ خو اوس په کور دننه د اقتصادي شرایطو د نامناسبوالي له امله د کورنیو پېرېدونکو د پېرلو وړتیا کمه شوې ده. له بلې خوا، د لېږد رالېږد د لارو اړوند ستونزو هم د بهرنیو پېرېدونکو بازار پیکه کړی دی.»
د لاسي صنایعو صنعتکاره حیفا الکوزۍ وايي چې د لاسي صنایعو صنعتکاران او هنرمندان، سره له دې چې د هېواد د لاسي هنرونو د ژوندي ساتلو او د خپل لاس د کار له لارې د ژوند د لګښتونو د برابرولو لپاره له ډېرې هڅې او لېوالتیا کار اخلي، د خپلو محصولاتو د پلور او بازارموندنې په برخه کې له جدي ستونزو سره مخ دي.
الکوزۍ زیاتوي: «موږ صنعتکاران په ډېر زحمت هڅه کوو چې د خپل هېواد هنرونه او لاسي صنایع ژوندي وساتو او د خپل لاس د کار له لارې ژوند وکړو؛ خو له بده مرغه، په دې ورځو کې د پلور بازار ډېر پیکه شوی او د خپلو محصولاتو د پلور لپاره مناسب پېرېدونکي او بازار نه لرو.»
دغه صنعتکاره وايي چې ښځینه صنعتکاران په نندارتونونو کې د حضور او ګډون له محدودیتونو سره هم مخ دي او دغه وضعیت د هغوی د محصولاتو د معرفي کولو او پلور فرصتونه کم کړي دي.
هغه وايي: «موږ ډېره مرسته نه غواړو؛ یوازې د کار، پلور او لیدل کېدو فرصت غواړو. مهرباني وکړئ زموږ غږ واورئ او د دغو ستونزو د حل لپاره یو ګام پورته کړئ.»
د لاسي صنایعو د یوه بل کارغالي مسوول احمد (مستعار نوم) وايي چې ګڼې ښځې د کاري ډلو په بڼه په خپلو کورونو کې د لاسي صنایعو پر تولید بوختې دي او په وروستیو میاشتو کې د هغوی د محصولاتو کیفیت او معیار هم ښه شوی دی؛ خو د دغو محصولاتو د پېر او پلور بازار ډېر سوړ شوی دی.
د دغه کارغالي مسوول وايي: «داسې ورځې راځي چې په ټوله ورځ کې ان یو پلور هم نه لرو. د لاسي صنایعو د بازار د پیکه کېدو له امله اړ شوو چې د خپلو کارکوونکو شمېر کم کړو.»
احمد زیاتوي: «که په نړیوالو بازارونو نندارې ته زموږ د محصولاتو د وړادندې کېدو زمینه برابره شي او د افغانستان لاسي صنایع نورو هېوادونو ته ور وپېژندل شي، زموږ د پلور بازار به هم ښه شي او د پېر او پلور کچه به لوړه شي. سره له هغه زیاره چې ګالو یې، له بده مرغه مطلوبه پایله نه ترلاسه کوو.»
په همدې حال کې د اقتصادي چارو کارپوه سیر قریشي خبرداری ورکوي چې د لاسي صنایعو د پلور بازار پیکه کېدل په مستقیم ډول د صنعتکارانو پر عوایدو اغېز کوي او کاري فرصتونه، په ځانګړې توګه د ښځو او هغو کورنیو لپاره چې له کوره کار کوي، کموي
قریشي وايي: «کله چې پلور کم وي، تولیدوونکی د لومړنیو توکو د پېرلو، د خپل کار د پراختیا او د نویو کسانو د ګومارلو توان له لاسه ورکوي او یو شمېر صنعتکاران اړ کېږي چې دغه کسب پرېږدي.» د هغه په وینا، د خلکو د پېرلو د وړتیا کمېدل، د لومړنیو توکو د بیو لوړوالی، د ارزانه توکو او ماشيني تولیداتو واردېدل، په بازارموندنه کې کمزورتیا او کورنیو او بهرنیو بازارونو ته محدود لاسرسی د لاسي صنایعو لپاره د تقاضا د کمېدو له مهمو عواملو دي.
دغه اقتصادي کارپوه ټینګار کوي چې د لاسي صنایعو د بازار د وضعیت د ښه کولو لپاره باید د محصولاتو د کیفیت او داسې ډیزاینونو لوړولو ته پاملرنه وشي چې د بازار له اړتیاوو سره برابر وي، انلاین پلور پراخ شي، نندارتونونه جوړ شي او د صادراتو لپاره زمینه برابره شي.
دا په داسې حال کې ده چې د طالبانو له واکمنېدو او د افغانستان له نړیولې انزوا وروسته، پر نورو برخو سربېره، لاسي صنایعو هم هغه ځای او رول تر ډېره له لاسه ورکړی چې په نړیوالو بازارونو کې یې ترلاسه کړی و او تولیدات یې پیګخ شوي دي. صنعتکاران، په ځانګړې توګه ښځې چې د دغو محصولاتو په تولید کې یې مهم رول درلود، د سختو جنسیتي محدودیتونو له امله نه شي کولای خپل توکي تولید، وپلوري اومعرفي کړي او له بلې خوا، بېساري اقتصادي ځوړ وضعیت وضعیت پسې لا خراب کړی دی.
