د کندهار یو شمېر اوسېدونکي او ځوانان وايي چې د خلکو د ږیرو د لنډولو او خرېیلو په تړاو د طالبانو د امر بالمعروف او نهی عن المنکر ریاست د محتسبانو چلند د تېر پرتله سخت شوی دی. د دوی په وینا، د خلکو د ظاهري بڼې پر څار سربېره، په ځینو مواردو کې د هغوی شخصي موبایلونه هم کتل کېږي. دوی وايي چې هره ورځ په ښار کې لسګونه کسان د ږیرو د لنډولو یا خرېیلو له امله درول کېږي. د دوی په وینا، ځینې کسان له څو ساعتونو وروسته خوشې کېږي او ځینې نور د طالبانو د امر بالمعروف او نهی عن المنکر ریاست ته لېږدول کېږي.
د دغو اوسېدونکو په وینا، په ځینو مواردو کې کله چې یو کس د ږیرې له امله ودرول شي، شخصي موبایل یې هم کتل کېږي. که په موبایل کې عکسونه، سندرې یا نور داسې مطالب وي چې د طالبانو د امر بالمعروف او نهی عن المنکر کارکوونکي یې له خپلو تګلارو سره په ټکر کې وبولي، د هغه کس د توقیف موده اوږدېږي.
د کندهار یو اوسېدونکی چې څه موده وړاندې د طالبانو د امر بالمعروف او نهی عن المنکر د محتسبانو له خوا نیول شوی و، وايي چې لومړی د ږیرې له امله ودرول شو، خو وروسته یې شخصي موبایل هم وکتل شو.
د کندهار دغه اوسېدونکی وايي: «طالبانو لومړی د ږیرې له امله ودرولم، وروسته یې موبایل راڅخه واخیست. زما او د ملګرو عکسونه یې پکې پیدا کړل او د عکسونو له امله یې هم یوه ورځ د امر بالمعروف او نهی عن المنکر په ریاست کې وساتلم.»
د کندهار ځوانان وايي چې د هر کس شخصي موبایل د هغه د شخصي حریم یوه مهمه برخه ده؛ خو د دوی په وینا، په دغه ښار کې د امر بالمعروف او نهی عن المنکر محتسبان د خلکو پر ظاهري بڼې د څار ترڅنګ، د هغوی شخصي معلوماتو ته هم لاسرسی پیدا کوي.
د کندهار یو بل اوسېدونکی چې د امنیتي ستونزو له امله نه غواړي نوم یې خپور شي، وايي چې له هغو کسانو سره چې خپلې ږیرې لنډوي، د طالبانو د محتسبانو چلند اوس د تېر پرتله سخت شوی دی.
د کندهار دغه اوسېدونکی زیاتوي: «که چا خپله ږیره خرېیلې یا ډېره لنډه کړې وي، لومړی یې دروي او وروسته یې موبایل ګوري. که په موبایل کې عکس یا سندره وي، ستونزه یې لا زیاتېږي او د امر بالمعروف او نهی عن المنکر ریاست ته یې بیایي.»
د هغه په وینا، په ځینو مواردو کې که یو کس ان د خپلې کورنۍ له ښځینه غړو سره هم وي، د ږیرې له امله درول کېږي او د خپلې کورنۍ په حضور کې له توند چلند او سختو خبرو سره مخ کېږي.
د کندهار یو ځوان وايي: «موږ اورېدلي چې د طالبانو د امر بالمعروف وزارت خپلو کارکوونکو ته اجازه نه ده ورکړې چې د خلکو موبایلونه وپلټي؛ خو دلته د طالبانو محتسبان دا کار کوي. هر څوک چې د ږیرې له امله ودروي، موبایل یې هم ګوري.» د هغه په وینا، دا وضعیت د دې لامل شوی چې ځوانان نه یوازې د خپلې ظاهري بڼې په اړه، بلکې د خپلو عکسونو، ویډیوګانو او نورو شخصي معلوماتو د چک کېدو او پلټل کېدو په اړه هم اندېښمن وي.
د کندهار یو شمېر اوسېدونکي هم وايي چې خلک د ږیرې له امله نه یوازې درول کېږي، بلکې په ځینو مواردو کې سپکاوی هم ورته کېږي او سپکې خبرې ورته کېږي.
د کندهار یو اوسېدونکی وايي: «زه یې ودرولم او راته یې وویل: منافق یې چې خپله ږیره دې خرېیلې او ځان دې له کفارو سره برابر کړی دی. وروسته یې راته وویل چې که بیا دې ږیره وخرېیله، یوه اوونۍ به بندي شې.»
د کندهار اوسېدونکي وايي چې د طالبانو د امر بالمعروف او نهی عن المنکر د ځینو محتسبانو سختګیري یوازې په هغو کسانو پورې نه محدودېږي چې ږیره یې خرېیلې یا لنډه کړې وي. د دوی په وینا، پر ځینو ږېرورکسانو هم هغه مهال نیوکه کېږي چې له خپلو هغو ملګرو سره ناست وي چې ږیره یې لنډه کړې وي.
یو بل اوسېدونکی وايي: «زه خپله ګڼه ږیره لرم، خو له یوه ملګري سره ناست وم چې ږیره یې لنډه کړې وه. وروسته د طالبانو د امر بالمعروف او نهی عن المنکر یو کارکوونکی راغی او راته یې وویل: له داسې فاسقو او منافقو کسانو سره مه کېنه چې ږیره یې لنډه یا خرېیلې وي.»
د کندهار ځوانان وايي چې یو کس د ږیرې د لنډولو یا خرېیلو له امله درول یوه موضوع ده، خو د هغه د شخصي موبایل پلټل، د عکسونو او سندرو کتل، د ملګرو په اړه د پوښتنې کول او د «منافق»، «فاسق»، «جاهل» او ورته نورو الفاظو کارول بیا جلا او لا جدي موضوع ده.
د دوی په وینا، د اصلاح او لارښوونې په نوم د طالبانو د امر بالمعروف او نهی عن المنکر د ځینو محتسبانو دغه ډول چلند د وېرې او فشار فضا رامنځته کوي او د انساني کرامت د نقض لامل کېږي؛ ځکه خلک له کوره د وتلو پر مهال تل اندېښمن وي چې هسې نه د طالبانو د محتسبانو له خوا په کومه پلمه له سپکاوي سره مخ شي. دوی وايي چې دې وضعیت د خلکو عادي ژوند له جدي ستونزو سره مخ کړی دی.
