په پروان ولایت کې ځایي سرچینې وايي چې په دغه ولایت کې د طالبانو والي عزیزالرحمان منصور د دې ډلې د څو ادارو رییسان له دندو ګوښه کړي او پر ځای یې خپل نږدې او اړوند کسان ګومارلي دي. د سرچینو په وینا، نوموړي د دغه ولایت څو مهم بستونه خپلو ملګرو، نږدې کسانو او د کورنۍ غړو ته سپارلې او دا لړۍ لا هم روانه ده. سرچینې زیاتوي چې د طالبانو والي خپل د تره زوی د دې ډلې د کلیو د بیارغونې رییس، خپل یو نږدې ملګری د طالبانو مستوفي او بل ملګری یې د دې ډلې ښاروال ګومارلی او هڅه یې کړې چې خپل زوم هم د طالبانو د کار او ټولنیزو چارو په ریاست کې وګوماري؛ خو دا هڅه د دواړو لورو د کسانو ترمنځ د وسله والې نښتې لامل شوې چې په پایله کې یې د دې ډلې شپږ جنګیالي ټپیان شوي دي. د سرچینو په وینا، دغه طالب چارواکي د دې ډلې تر کنټرول لاندې دولتي ادارې د خپلو ملګرو او نږدې کسانو پر مرکز بدلې کړې دي. سرچینې دغه راز وايي چې طالبان تر خپلې ولکې لاندې دولتي ادارې «جنګي غنیمت» ګڼي او د دې ډلې هر چارواکی خپل ځان ته د نږدې او وفادارو کسانو ګومارل خپل حق بولي. د سرچینو په وینا، اوس د پخواني حکومت د کارکوونکو د ګوښه کولو بهیر تر ټولو لوړې کچې ته رسېدلی او ګڼ تجربهلرونکي او متخصص کارکوونکي له دندو لېرې کړای شوي دي.
د سرچینو د معلوماتو له مخې، د طالبانو د کلیو د بیارغونې ریاست، د دې ډلې ښاروالۍ، د اسلامي زدهکړو آمریت، د طالبانو د پوهنې ریاست او د مستوفیت ریاست له هغو ادارو دي چې عزیزالرحمان منصور پکې خپل نږدې او اړوند کسان ګومارلي دي. د سرچینو په وینا، هغه خپل د تره زوی محمدامین د طالبانو د کلیو د بیارغونې رییس او خپل یو نږدې ملګری د دې ډلې مستوفي ګومارلی دی.
سرچینې وايي، د اختلاف وروستۍ پېښه په پروان کې د طالبانو د کار او ټولنیزو چارو د رییس د بدلون او پر ځای یې د عزیزالرحمان منصور د زوم قاري ریحان د معرفي کولو پر سر رامنځته شوې ده. د سرچینو په وینا، قاري ریحان اوس د طالبانو د والي د سکرتر په توګه دنده ترسره کوي. سرچینې زیاتوي چې په پروان کې د طالبانو د کار او ټولنیزو چارو رییس قدرتالله ذاکر له دې پرېکړې سره مخالفت کړی او همدې موضوع د هغه او د طالبانو د والي د نږدې کسانو ترمنځ ترینګلتیا رامنځته کړې ده.
سرچینې وايي، په پروان کې د طالبانو والي ته یو نږدې کس حضرتالله خالد په دې اختلاف کې رول درلود او عزیزالرحمان منصور ورته دنده سپارلې وه چې د طالبانو د کار او ټولنیزو چارو رییس استعفا ته اړ کړي. د سرچینو په وینا، حضرتالله خالد د پخوانیو نظامیانو په څو وژنو کې هم لاس لري. سرچینې په ځانګړې توګه نوموړی د طالبانو له واکمنېدو وروسته د پخواني حکومت د قومونو او قبایلو د رییس د ورور آغاشیرین په وژنه کې په لاس لرلو تورنوي.
سرچینې زیاتوي چې د دې اختلاف له امله د دواړو لورو وسلهوال کسان ډګر ته راوتلي او د طالبانو د والي د نږدې کسانو او د دې ډلې د کار او ټولنیزو چارو د رییس د ساتونکو ترمنځ نښته شوې ده. د سرچینو په وینا، په دې پېښه کې د دواړو لورو لږ تر لږه شپږ کسان ټپیان شوي دي؛ خو د مرګژوبلې د کره شمېر او د ټپیانو د وضعیت جزئیات روښانه نه دي.
سرچینې دغه راز وايي چې په پروان کې د طالبانو والي په دغو ادارو کې د دې ډلې د ځایي چارواکو د بدلون ترڅنګ، د طالبانو یو شمېر نور سیمهییز چارواکي هم له دندو ګوښه کړي او پر ځای یې نور کسان ګومارلي دي. د هغوی په وینا، د طالبانو د حج او اوقافو پخوانی رییس چې د پنجشېر اوسېدونکی و، له دندې لېرې شوی او پر ځای یې بل کس معرفي شوی دی.
د سرچینو په وینا، هغه په بامیان کې د طالبانو پخوانی ښاروال مولوي روزيمحمد افکار چې د ده یو نږدې ملګری دی، په تبدیلي ډول د چاریکار ښار لپاره د دې ډلې د نوي ښاروال په توګه ګومارلی دی.
دغه راز، د طالبانو د اسلامي زدهکړو پخوانی آمر مولوي شیراجان له دندې ګوښه شوی او پر ځای یې مولوي طاهر معرفي شوی چې تر دې مخکې د یوه جومات امام و.
سرچینې زیاتوي چې د طالبانو د بدني روزنې آمر هم د عزیزالرحمان منصور لهخوا بدل شوی او د دې ادارې د نوي مسوول په توګه د مولوي انصارالله په نوم د یوکس د معرفي کولو مکتوب صادر شوی دی؛ خو دغه ګومارنه تر اوسه وروستۍ شوې نه ده. د سرچینو په وینا، د طالبانو د تېلو او ګازو آمر هم بدل شوی او د طالبانو والي ته یو نږدی کس یې پر ځای ګومارل شوی دی.
عزیزالرحمان منصور تر دې مخکې په پکتیا کې د طالبانو د والي د مرستیال او وروسته د دې ډلې د ارشاد، حج او اوقافو وزارت د دیني او عرفاني مرکزونو د همغږۍ برخې د مرستیال په توګه دندې ترسره کړې دي.
دا په داسې حال کې ده چې په تېرو څه باندې پنځو کلونو کې ګڼو رسنیزو راپورونو او د ۸صبح ورځپاڼې موندنو ښودلې چې طالبانو په پراخه کچه خپل اړوند او ځان ته وفادار کسان پر دولتي دندو ګومارلي دي. د ۸صبح ورځپاڼې د یوې څېړنیزې راپور موندنې ښيي چې د طالبانو تر کنټرول لاندې د ترافیکو ریاست د قومي انحصار او د میدانوردګو او کندهار ولایتونو د اړوندو کسانو د واکمنۍ پر مرکز بدل شوی دی. د دغو موندنو له مخې، د دې ادارې شاوخوا ۸۰ سلنه مدیران، آمران او کلیدي کارکوونکي د میدانوردګو ولایت دي او ټولې مدیریتي او آمریتي دندې د وردګو او کندهار د پښتنو په واک کې دي. دغه راز، د دغه راپور موندنې ښيي چې د ترافیکو عمومي ریاست له ۲۱ مدیریتونو او آمریتونو ۱۸ یې د میدانوردګو ولایت د اوسېدونکو په واک کې دي.
تر دې وړاندې هم ۸صبح ورځپاڼې په یوه څېړنیز راپور کې موندلې وه چې په نیمروز کې د طالبانو د پوهنې رییس خپل ۱۷خپلوان په دغه ریاست کې ګومارلي دي. د دغه راپور موندنو ښودلې وه چې یو شمېر دغه کسان یې د پیسو په بدل کې هم پر دغو دندو ګومارل شوي دي.
