۸صبح، کندهار: په کندهار ولایت کې سرچینې وايي چې د طالبانو د مشرملا هبتالله آخوندزاده په امر د نوري فایبر شبکې د پراختیا کار درول شوی دی.
سرچینو یکشنبه د وږي پر ۲۹مه، ۸صبح ورځپاڼې ته وویل چې د طالبانو مشر امر کړی دی څو تر بل امر پورې په ټول افغانستان کې د نوري فایبر پروژې کار ودرول شي.
د سرچینو په وینا، د طالبانو مشر د دلیل له وړاندې کولو پرته دا امر کړی او د دغې ډلې د مخابراتو او معلوماتي ټکنالوژۍ وزارت یې اړ ایستلی چې د دغې پروژې کارونه وځنډوي.
سرچینې زیاتوي چې د نوري فایبر پروژې د کار په درېدو سره په یو شمېر ولایتونو کې د مخابراتي شبکو غږیز او نور خدمتونه له ګډوډۍ سره مخ شوي او خلک نه شي کولای له دغو خدمتونو په سمه توګه ګټه واخلي.
نوري فایبر هغه کیبل دی چې د برېښنا پر ځای معلومات د رڼا له لارې لېږدوي.
له همدې امله، دا کیبل د عادي کیبلونو پرتله کولای شي د معلوماتو خورا لوړه کچه په لوړ سرعت سره ولېږدوي او د ثابت او لوړ ظرفیت لرونکي انټرنیټي شبکې رامنځته کولو بنسټ ګڼل کېږي.
