هندي چارواکو د لومړي ځل لپاره په دوحه کې له طالب مشرانو سره وکتل

هندي رسنیو رپوټ ورکړی چې د لومړي ځل لپاره هندي چارواکو په دوحه کې د طالبانو له مشرانو سره کتلي دي.
له دې مخکې هندوستان ټایمز رپوټ ورکړی چې هند له طالب مشرانو سره اړیکې نیولي خو تراوسه یې مخامخ نه دي سره کتلي.
د هندوستان ټایمز د رپوټ له مخې، د شخړو د اواري په چارو کې د قطر د بهرنیو چارو وزارت ځانګړي استازي مطلق بن ماجد القحطاني د غبرګولي په ۳۱مه نېټه ویلي چې هندي چارواکو له طالب مشرانو سره کتلي دي.
القحطاني زیاته کړې چې هند له طالبانو سره په تماس کې دی ځکه طالبان به د راتلونکي حکومت برخه وي.
نوموړي په واشنګټن کې د عرب مرکز په آنلاین ناسته کې چې د افغانستان د سولې په اړه جوړه شوې وه ویلي هندي چارواکو او طالب مشرانو سره کتلي دي، خو په اړه یې نور جزیات نشته.
هند له دې مخکې طالبان یوه ترهګره ډله او د پاکستان استازې بللې وه، تېر کال د افغانستان د سولې لپاره د امریکا ځانګړي استازي زلمي خلیلزاد وړاندیز کړی و چې هند دې خپلې اندېښنې په مستقیمه توګه له طالبانو سره شریکې کړي.
د یادولو وړ ده چې د هند د بهرنیو چارو وزیر جې شنکر، د غبرګولي په ۲۵مه نېټه، د قطر په پلازمېني دوحه کې له زلمي خلیلزاد سره کتلي و.
اټکل کېږي چې جي شنکر به په دوحه کې له طالب مشرانو سره هم کتلي وي.
د هند بهرنیو چارو وزارت او د طالبانو ډلې تراوسه په دې اړه څه نه دي ویلي.