۸صبح، کابل: د افغان ښځو لپاره د امریکا ځانګړې استازې رینا امیري وایي، د افغانستان د راتلونکي په تړاو بحثونو کې د ښځو له ګډون پرته په دغه هېواد کې د سولې او ثبات ټینګښت ناشونی دی.
امیري چهارشنبه د چنګاښ پر۶ مه « په ډیپلوماسۍ کې د ښځو د نړیوالې ورځې» په مناسبت جوړې شوې غونډې ته ویلي، چې افغان ښځو د دغه هېواد په تاریخ کې د پاموړ رول لرلی دی.
هر کال د جون ۲۴مه د ډيپلوماسۍ په برخه کې د ښځور د رغنده رول د درناوي په پار په ډیپلوماسۍ کې د ښځو د نړیوالې ورځې په توګه نمانځل کیږي.
د افغان ښځو لپاره د امریکا ځانګړې استازې د دوحې درېیمې غونډې ته په نغوتې سره ټینګار کړی، چې د ښځو په نشتوالي کې هر ډول خبرې اترې د افغانستان د راتلونکي لپاره د حل لارې تضمینوونکې نه دي.
مېرمن امیري دا خبرې په داسې حال کې کړې دي چې ظاهراً د دوحې د درېیمې غونډې له اجنډا ښځې اېستل شوې دي.
د امريکا د بهرنيو چارو وزارت رسنيو ته ويلي، چې د دوحې په تېرو غونډو کې د امريکا استازو (امري او ويسټ) ګډون کړی دی، خو په دې غونډه کې د ګډون لپاره د سفر پلان نه لري.
تر دې وړاندې د بشري حقونو د څار سازمان په یوه راپور کې د ملګرو ملتونو لخوا د دوحې د غونډې له اجنډا د ښځو اېستل «ناهیله کوونکي» بللی وو.
