۸صبح، نیمروز: طالبانو اعلان کړی چې د افغانستان د نیمروز ولایت او د ایران د سیستان و بلوچستان ولایت د میلک بندر ترمنځ د ترانزیټي موټرو تګ راتګ ۲۴ ساعته شوی دی.
په نيمروز کې د طالبانو د والي د دفتر رییس سیفالله محمدي دوشنبه د لړم پر ۴مه، ویلي چې تر دې وړاندې هره ورځ شاوخوا ۴۰۰ باروړونکو موټرو د وارداتي او صادراتي توکو د لېږد لپاره د میلک بندر له لارې تګ راتګ کاوه.
د نوموړي په وینا، د دغه بندر د ۲۴ ساعته فعالیت په پیلېدو سره، د تګ راتګ کوونکو موټرو شمېر په ورځ کې ۸۰۰ ته لوړ شوی دی.
د میلک بندر د افغانستان د نیمروز ولایت او د ایران د سیستان و بلوچستان ولایت ترمنځ پر پوله پروت دی. دغه بندر د دواړو هېوادونو ترمنځ یوه له مهمو سوداګریزو لارو ګڼل کېږي او افغانستان ته د ایراني توکو د لېږد یوه مهمه لار ده.
