۸صبح، کابل: د ایران د انرژۍ وزیر عباس عليابادي د طالبانو د شرکتونو له رییس احمدجان بلال سره په لیدنه کې ویلي چې هېواد یې چمتو دی افغانستان ته تر دوه زره مېګاواټه برېښنا چمتو کړي.
د طالبانو د خبرپاڼې پر بنسټ، عليابادي شنبه د وږي پر ۲۸مه ویلي چې ایران چمتو دی د برېښنا او د تخنیکي کادرونو د روزنې په برخو کې له افغانستان سره همکاري وکړي.
په دې لیدنه کې د برېښنا، د څښاک پاکو اوبو د برابرولو او د ناولو اوبو د تصفیې د تاسیساتو د جوړولو په برخو کې پر ګډې همکارۍ هم خبرې شوې دي.
احمدجان بلال په دې لیدنه کې د انرژۍ په برخه کې له ایران سره د اړیکو پر پراختیا، د تخنیکي وړتیاوو پر پیاوړتیا او د ګډو پروژو پر پلي کولو هم ټینګار کړی دی.
