۸صبح، کندهار: په کندهار کې د طالبانو والي ملا محمد شیرین د افغانستان لپاره د نړیوال بانک له رییس فارس حداد زیروس او د ملګرو ملتونو د خوړو او کرنې سازمان (فایو) له مسوول ریچارډ ترینچارډ سره کتلي دي.
په کندهار کې د طالبانو د رسنیو دفتر شنبه د وږي پر ۲۸مه، په ډاګه کړې چې ملا محمد شیرین په دې کتنه کې له نړیوال بانکه په دغه ولایت کې د زیربنايي پروژو د پلي کولو غوښتنه کړې ده.
د دغې خبرپاڼې له مخې، په دغو پروژو کې د دهلې بند لوړول، د میرویس حوزوي روغتون ملاتړ، د سړوخونو او چکډېمونو جوړول، د مېوو بازارموندنه او د مخدره توکو د بديل کښت ملاتړ شامل دي.
فارس حداد زیروس ویلي چې نړیوال بانک د طالبانو له بیا واکمنېدو وروسته په افغانستان کې خپلو فعالیتونو ته دوام ورکړی دی.
نوموړي زیاته کړې چې د فایو مالي چارې هم د نړیوال بانک له خوا تمویلېږي.
د هغه په وینا، نړیوال بانک له سیمهییزو مسوولانو سره د خصوصي سکتور د پیاوړتیا او خلکو ته د کاري فرصتونو د برابرولو په برخه کې د پروژو د پلي کولو لپاره همکاري کوي.
