مـيـنـاتـوري ملي اټن او افغاني رباب په يونسکو کې

د اطلاعاتو او کلتور وزارت سرپرست محمد طاهر زهير د روان کال د کب په پنځمه، په خبري ناسته کې وويل چې، تمه ده دغه درې نه لمس کېدونکي فرهنګي ميراثونه (بهزاد میناتوري، ملي اټن او رباب) يونسکو سازمان ته د ثبت په موخه معرفي کړي.
د اطلاعاتو او کلتور سرپرست وويل چې، دغه وزارت تر دې دمه د هېواد ۲۰ نه لمس کېدونکي فرهنګي ميراثونه په ملي کچه ثبت کړي او په يونسکو کې د دغو ميراثونو د ثبت لپاره هم هڅې روانې دي.
نوموړي څرګنده کړه چې د دغو ۲۰ نه لمس کېدونکو فرهنګي ميراثونو له ډلې، د درېیو کلتوري ميراثونو (د بهزاد سبک ميناتوري، ملي اټن او افغاني رباب) دوسيې او لاسوندونه بشپړ شوي او د بهرنيو چارو وزارت له لارې به د نړۍ نه لمس کېدونکي کلتوري ميراثونو کې، د ثبت په موخه، يونسکو سازمان ته معرفي او وسپارل شي.
ښاغلي زهير څرګنده کړه چې يونسکو هر کال له هر هېواده يوازې يو نه لمس کېدونکی فرهنګي ميراثونه ثبتوي. نوموړي وويل، په دې سبب چې افغانستان د خپلو نه لمس کېدونکو فرهنګي ميراثونو په ثبت کې ډېر ځنډ کړی او د افغانستان نه لمس کېدونکي فرهنګي ميراثونه له خطر سره مخ دي؛ نو له يونسکو سازمان څخه غوښتنه لرو چې لږ تر لږه په کال کې درې ميراثه ومني او ثبت یې کړي.
محمد طاهر زهير وويل چې د هېواد ۱۷ نه لمس کېدونکي فرهنګي ميراثونه چې په اطلاعاتو او کلتور وزارت کې په ملي کچه ثبت شوي او په راتلونکو کلونو کې به په يونسکو کې د دغو ميراثونو د ثبت لپاره ګام واخيستل شي. ياد ۱۷ فرهنګي نه لمس کېدونکي ميراثونه په لاندې ډول دي: مسګري، قرصک، فلک‌بازي، کاشي جوړونه، نستعليق خط، د ورېښمو چينجیو روزنه، ورېښم اوبدل، چارده‌پال (چهارده پال)، پيشپو، برک اوبدل، نيزه‌بازي، سمنک، ميرآب، د نورستان لرګین هنر، د يلدا شپه، بادګير او بادي ژرنده ده، چې یونسکو لخوا ثبت شوي دي.
د اطلاعاتو او کلتور وزير له هېوادوالو وغوښتل چې که د نه لمس کېدونکي کلتوري ميراثونو په تړاو، چې تر دې دمه يې نوم نه دی اخيستل شوی، معلومات لري، نو هغه دې د اطلاعاتو او کلتور وزارت سره شريک کړي.