۸صبح، کابل: د ملګرو ملتونو د بشري چارو د همغږۍ دفتر (اوچا) په یوه راپور کې ویلي چې په کندهار کې د کابل بانک پر دفتر د داعش خراسان څانګې د برید موخه په ځانګړي ډول د طالبانو غړي وو.
دغه راپور دوشنبه د وري پر ۲۰مه شپه مهال د «اسیا او ارام سمندر سیمې ته کتنه» تر سرلیک لاندې خپور شوی دی.
اوچا په کندهار کې وروستی برید په څه باندې دوهنیمو کلونو کې د داعش خراسان څانګې له خوا د طالبانو پر غړو ترټولو «خونړی» برید بللی دی.
د راپور پر بنسټ، په دغه برید کې د طالب ډلې په شمول لږترلږه ۲۱ تنه ووژل شول.
ورته مهال، سیمهییزو سرچینو ۸صبح ورځپاڼې ته منلې چې پنجشنبه د وري پر ۲مه د کندهار ښار په لومړۍ ناحیه کې د ځانمرګي برید پایله کې د پنځو طالب چارواکو په ګډون ۴۵ کسان وژل شوي او ۵۶ نور ټپیان دي.
داعش ډلې د کابل بانک د ولایتي دفتر مخې ته د برید پړه پر غاړه اخیستې او ادعا یې کړې چې د دغې ډلې بریدګر د طالبانو د شاوخوا ۱۵۰ غړو په منځ کې ځانمرګی برید کړی دی.
