د کابل په لوېدیځ کې د امید سبز ښارګوټي یو شمېر اوسېدونکي د طالبانو د عدلیې وزارت د پلاویو لهخوا د کورونو د ارزونې دوام او د دې ډلې د فشارونو زیاتېدو ته اندېښمن دي. هغوی وايي، د طالبانو بېلابېل پلاوي په پرلهپسې ډول د اوسېدونکو کورونو ته ورځي او ډېری وخت دا لیدنې په داسې ساعتونو کې ترسره کېږي چې د کورنۍ نارینه په کور کې نه وي. د سیمې د اوسېدونکو په وینا، په داسې شرایطو کې کورونو ته د وسلهوالو کسانو ننوتل د ښځو او ماشومانو د ځورونې لامل شوي او د هغوی په منځ کې یې د ناامنۍ سخت احساس رامنځته کړی دی.
د امید سبز ښارګوټي اوسېدونکي ټینګار کوي چې د دې وضعیت دوام د خلکو عادي ژوند ګډوډ کړی او هغوی شپه او ورځ په دې اندېښنه کې تېروي چې هسې نه خپل کورونه له لاسه ورکړي. د هغوی په وینا، په تېرو درېیو اوونیو کې یې د طالبانو اړوندو لسګونو ادارو ته مراجعه کړې څو خپل غږ طالب چارواکو ته ورسوي، خو هېڅ یوې ادارې یې غوښتنو ته غوږ نه دی نیولی.
د امید سبز ښارګوټي یو اوسېدونکی، محمد (مستعار نوم)، وايي چې دوه ورځې مخکې د طالبانو وسلهوال کسان په داسې حال کې په زور د ده کور ته ننوتل چې نوموی په خپل کارځای کې و او د ده له مېرمنې، مور او ماشومانو سره یې سپکوونکی چلند وکړ.
د امید سبز ښارګوټي دغه اوسېدونکی زیاتوي: «زما او د کورنۍ ټوله شتمني همدا یو اپارتمان دی چې په ډېرو ستونزو مې اخیستی دی. دوه ورځې وړاندې په داسې حال کې چې په دنده کې وم، د طالبانو څو وسلهوال کسان او نور کسان په زور او تاوتریخوالي زما کور ته ننوتل، زما مېرمن، مور او ماشومان یې سپک اوتوهین کړل او زما د مېرمنې د ګوتې نښه یې واخیسته. هغې ته یې وویل چې له دې وروسته باید د خپل کور کرایه ورکړي.»
محمد وايي: «زما کورنۍ ډېر وېروونکی حالت تېر کړی دی. د مېرمنې او دوو کوچنیو لوڼو وضعیت مې ډېر خراب دی او هغوی هره شېبه وېرېږي.
د دغه ښارګوټي یو بل اوسېدونکی د خلکو کورونو او شخصي ملکیتونو ته د طالبانو د کسانو ننوتل له خصوصي حریمه ښکاره سرغړونه بولي او وايي چې دا کار له قوانینو، د خلکو له دودونو او کلتور سره په ټکر کې دی.
د امید سبز ښارګوټي دغه اوسېدونکی وايي: «موږ نه پوهېږو چې دلته څو حکومتونه شته. زما په اند، د طالبانو هر غړی ځان ته جلا حکومت دی. که داسې نه وي، نو ولې یو وزارت ځان ته دا حق ورکوي چې د خلکو کورونه وپلټي؟ ایا موږ غلا کړې ده یا مجرمان یو؟ ایا محکمې زموږ د کورونو د ارزونې او پلټنې حکم صادر کړی دی؟ باور وکړئ، له موږ سره ډېره بې عزتي کېږي. د طالبانو کسان زموږ شخصي حریم ته ننوځي او ان زموږ د خوب خونه یې هم ثبت او لېست کړې چې څو المارۍ او نور وسایل لرو.»
په همدې حال کې، د دغه ښارګوټي یو شمېر اوسېدونکي وايي چې استازو یې په تېرو درېیو اوونیو کې څو ځله هڅه کړې چې د طالبانو له لوړپوړو چارواکو سره وګوري او خپلې ستونزې ورسره شریکې کړي، خو تر اوسه پردې کار نه دي توانېدلي.
امید سبز ښارګوټی د کابل په لوېدیځ کې موقعیت لري او ډېری اوسېدونکي یې د افغانستان هزارهګان او شیعهګان دي. ویل کېږي چې اوسمهال په دې ښارګوټي کې تر ۱۱ زرو ډېرې کورنۍ ژوند کوي.
طالبانو تر دې وړاندې د هرې استوګنیزې خونې لپاره په میاشت کې څلور زره افغانۍ کرایه ټاکلې او د کورونو له مالکانو او کرایه کوونکو یې غوښتي چې دې ډلې ته د تېرو شپږو میاشتو کرایه دې ورکړي. د اوسېدونکو په وینا، هغه کسان چې د دغو پیسو له ورکړې ډډه وکړي، اړ ایستل کېږي چې خپل کورونه تخلیه کړي.
دې ډلې دغه راز د اوسېدونکو یو شمېر هغه استازي نیولي چې د کورونو د تخلیه کولو له حکم سره یې مخالفت کړی و. د سرچینو په وینا، ځینې نیول شوي کسان د طالبانو د عدلیې وزارت د ودانۍ دننه په یوه ځای کې چې «ډبرینه کوټه» نومېږي، ساتل کېږي، څو یا ټاکل شوې کرایه ورکړي او یا دا ژمنه وکړي چې خپل کورونه تخلیه کوي.
