د کونړ په ولایتي روغتون کې د هیمو دیالیزـ بډوډو د درملنې مرکز پرانیستل

مسوولین وایي دغه مرکز د عامې روغتیا وزارت په مالي لګښت جوړ شوی چې د بډوډو ناروغانو وړیا درملنه کوي.
د عامې ورغتیا وزارت د معالجوي طب عمومي رئیس محب الله ځیر وویل: «دغه روغتیایي مرکز د عامې روغتیا وزارت په مالي مرسته د (۷،۶) میلیونه افغانیو په لګښت د لومړي ځل لپاره په کونړ کې جوړ شوی چې نور به دغه ناروغان دې ته اړ نه وي چې نورو ولایتونو او یا بهرنیو هېوادونو ته ولاړ شي.»
نوموړي زیاته کړه، په دې مرکز کې د فارمسۍ، اې سي جي، التراساونډ، اوبو د تصفیې او پياوړي کولو څانګې په عصري وسایلو سمبال شوې او ترڅنګ یې د روغتیایي کارکوونکو روزنې ته هم جدي پاملرنه شوې ده.
د کونړ د والي محمد اقبال سعید په وينا دغه مرکز کې به په وړیا توګه هېوادوالو ته خدمات وړاندې کوي او هېوادوال به نور دې ته نه اړ نه وي چې د بډوډو د درملنې لپاره ډېرې پيسې ولګي.
هغه وایي چې په ولایتي روغتون کې د سترګو، غوږ، پزې او ستوني تخصصي څانګو په فعالېدو سره خلکو ته یو لړ آسانتیاوې رامنځته شوې او د روغتون د نویو ودانیو په جوړېدو سره به په نورو بېلابېلو برخو کې هم آسانتیاوې برابرې شي.
ځایي خلک په ولایتي روغتون کې د بډوډو د درملنې مرکز فعالېدل د کونړ د اوسېدونکو لپاره ښه زیری بولي او له روغتیا وزارته په نورو روغتیايي برخو کې د اسانتیاوو د برابرولو غوښتونکي دي.