عامه دولتي خدمات انټرنیټي کېږي

افغان پوست شرکت د وري په ۱۵مه نېټه د عامه خدماتو آنلاین سیستم پرانیست.
د دغه شرکت رییس وحید ویس وویل چې دا سیستم په آنلاین توګه د ډول ډول عامه دولتي خدماتو د وړاندې کولو وړتیا لري.
ویس زیاتوي چې په اوسني وخت کې د عامه دولتي خدماتو د وړاندې کولو لپاره د بهرنیو چارو له وزارت سره تفاهم لیک لاسلیک شوی دی.
هغه له نورو دولتي ادارو هم وغوښتل چې د خدماتو د وړاندې کولو لپاره له نوموړي شرکت سره هوکړه لاسلیک کړي.
وحید ویس څرګنده کړه چې افغان پوست شرکت ۱۵۰ ډوله عامه خدمات په ګوته کړي او د عامه خدماتو په آنلاین سیستم کې یې شامل کړي دي.
هغه همداراز جوته کړه چې افغان پوست شرکت د خپل آنلاین خدماتي سیستم په رامنځته کولو د پوست خونو له لارې د هېواد په مرکز او ولایتونو کې د عامه خدمتونو د وړاندې کولو وړتیا لري.
د افغان پوست شرکت رییس همداراز وویل چې په اوسني وخت کې هېوادوال ددغه شرکت وېبپاڼې ته په مراجعې د آنلاین خدماتو سیستم ته داخلېدای شي ترڅو له دې لارې وثایق، تحصیلي سندونه او یا تذکرې د بهرنیو چارو وزارت د تایید په موخه ولېږي.
ښاغلي ویس په خبره، هېوادوال کولی شي له لنډې مودې وروسته چې سیستم یې ورته ټاکي د اوسېدو سیمې ته له نږدې پوست خونې خپل اسناد ترلاسه کړي.
د افغان پوست شرکت مسوولین وايي چې د عامه خدماتو د آنلاین سیستم کارول د هېوادوالو لپاره دېرې آسانتیاوې برابروي او په یوه ځای کې د خلکو د راټولېدو مخنیوی کوي.