اردن او بحرین پر سعودي عربستان د حوثیانو وروستي بریدونه غندلي او له ریاض سره یې د پیوستون پر اعلانولو سربېره، خبرداری ورکړی چې پر ملکیانو او ملکي زیربناو بریدونه د نړیوالو قوانینو نقض دی.
د اردن د بهرنیو چارو وزارت ویاند فواد المجالي شنبه د سپټمبر پر ۱۹مه، وویل چې عمان «په مطلق ډول» له سعودي عربستان سره خپل پیوستون اعلانوي.
نوموړي زیاته کړې چې اردن د هغو ټولو اقداماتو ملاتړ کوي چې ریاض یې د خپل حاکمیت، امنیت، ثبات او خپلو وګړو د خوندیتوب لپاره ترسره کوي.
د بحرین د بهرنیو چارو وزارت هم دا بریدونه «د نړیوالو قوانینو، نړیوالو بشري حقونو، د ملګرو ملتونو د منشور او د ملګرو ملتونو د امنیت شورا د اړوندو پرېکړهلیکونو ښکاره نقض» بللی دی.
دغې ادارې د ملګرو ملتونو له امنیت شورا غوښتي چې خپلو مسوولیتونو ته پام وکړي، د دغو بریدونو پر وړاندې پرېکنده دریځ غوره کړي او عاملان یې ځواب ویلو ته اړ کړي.
