ځینې هغه محصلان چې له ایرانه افغانستان ته راستانه شوي، وايي چې طالبانو دوی د دې ډلې پر ضد د تبلیغ په تور نیولي او بندیان کړي دي او یو شمېر یې لا هم د طالبانو په زندانونو کې دي. د نیول شویو کسانو شمېر معلوم نه دی، ځکه طالبان له هغو کسانو چې له زندانونو خوشې کوي، لیکلې ژمنه اخلي چې په دې اړه به څه نه لیکي او له رسنیو سره به هم خبرې نه کوي. له دې سره سره، یو هغه محصل چې د دې ډلې پر ضد د تبلیغ په تور افغانستان ته د سفر پر مهال څلور میاشتې بندي شوی، تاییدوي چې له څو نورو محصلانو سره یوځای بندي و.
طالبان په تېرو څه باندې پنځو کلونو کې تل د هېوادوالو له لوري په غچاخیستنه تورن شوي دي. دغه ډله هغه کسان نیسي، بندیانوي او شکنجه کوي چې د طالبانو پر حکومت نیوکه کوي. طالبانو په رسمي ډول هم اعلان کړی چې د دوی پر واکمنۍ نیوکه جرم ګڼل کېږي او د هېوادوالو د هر ډول مدني او سیاسي فعالیت مخه یې نیولې ده. دې ډلې خبرداری ورکړی چې هېڅوک په افغانستان کې د سیاسي او ټولنیز فعالیت حق نه لري.
یو له دغو محصلانو حسن (مستعار نوم) وايي چې د روان کال په پسرلي کې د اسلام کلا په پوله کې د طالبانو د استخباراتو له لوري ونیول شو. هغه زیاتوي چې د طالبانو د استخباراتو ځواکونو لومړی هغه وځوراوه او شکنجه یې کړ او وروسته یې د دې ډلې محکمې ته ور وپېژانده. هغه ټینګار کوي چې د طالبانو محکمې د دې ډلې پر ضد د تبلیغ په تور هغه پر څلور میاشتې بند محکوم کړ او هغه ټوله موده یې په زندان کې تېره کړه.
دغه محصل زیاتوي چې طالبان په ټولنیزو شبکو کې د فعالو او د دې ډلې پر ضد د نیوکو کوونکو کسانو پر وړاندې سخت چلند کوي. د هغه په وینا، هغه کسان چې له هېواده بهر هم په ټولنیزو شبکو کې د طالبانو پر ضد فعالیت کوي، افغانستان ته د راتګ پر مهال پېژندل کېږي، نیول کېږي او شکنجه کېږي.
حسن وايي چې له ده سره هممهاله په زندان کې نور محصلان هم وو چې د دې ډلې پر ضد د تبلیغ په تور نیول شوي او بندیان شوي وو او تر اوسه خوشې شوي نه دي. د هغه په وینا، طالبان له ټولو هغو کسانو چې په دې تور یې نیسي، له خوشې کېدو وروسته ژمنه اخلي چې په دې اړه به څه نه لیکي او له رسنیو سره به خبرې نه کوي.
دغه محصل له هغو کسانو چې د طالبانو پر ضد لیکنې کوي، غواړي چې افغانستان ته بېرته راستانه نه شي؛ ځکه د هغه په وینا، شرایط ورته مناسب نه دي. هغه زیاتوي: «هغو کسانو ته چې افغانستان ته د راتلو هوډ لري، خبر ورکړئ چې هېڅکله دې نه راځي، ځکه نیول کېږي.» د هغه په وینا، طالبان له هر هغه چا غچ اخلي چې د دې ډلې پر وړاندې یې څه لیکلي وي.
دغه ځوان همداراز ټینګار کوي چې اوس مهال د طالبانو په حکومت کې د لوستو او تحصیل کړو کسانو لپاره هېڅ کاري زمینه نشته. د هغه په وینا، دغه ډله یوازې هغه کسان په دولتي ادارو کې جذبوي چې د جګړې او پوځي فعالیتونو مخینه ولري.
د بېپولې خبریالانو سازمان تر دې وړاندې راپور ورکړی و چې طالبانو د دې ډلې د چارواکو پر وړاندې د رسنیو د نیوکو غږ چوپ کړی دی. د دغه سازمان په وینا، د طالبانو لارښوونو د هغو کسانو د مجازاتو زمینه برابره کړې ده، چې د دې ډلې مشرانو ته په سپکاوي تورنېږي؛ هغه سزاوې چې کېدای شي پکې په دُرو وهل یا بند شامل وي. دغه سازمان زیاته کړې چې طالبانو په تېرو پنځو کلونو کې له ۲۰ ډېر داسې فرمانونه او لارښوونې صادرې کړې دي چې رسنۍ په جدي ډول محدودوي او ځپي. د بېپولې خبریالانو د سازمان په وینا، یو شمېر دغه لارښوونې د طالبانو د ادارو له لوري په شفاهي ډول رسنیو ته ابلاغېږي.
د طالبانو د عدلیې وزیر عبدالحکیم شرعي ویلي چې د دې ډلې تر واکمنۍ لاندې افغانستان کې سیاسي ګوندونو ته د فعالیت اجازه نشته او ان د ګوند د شتوالي یادونه هم جرم ګڼل کېږي.
دا په داسې حال کې ده چې تر دې وړاندې په غور کې سرچینو ویلي وو چې طالبانو د جمعې د لمانځه پر مهال د دغه ولایت اوسېدونکو ته خبرداری ورکړی چې په ټولنیزو شبکو کې د خپل نظر د څرګندولو یا د دې ډلې د مخالفو مطالبو د خوښولو حق نه لري. طالبانو د غور هغو اوسېدونکو ته چې له هېواده بهر اوسېږي، هم خبرداری ورکړی چې که د دې ډلې د مخالفانو مطالب «لایک» کړي او «کامېنټ» پرې وکړي، خپلوان او د کورنۍ غړي به یې ونیول شي او بندیان به شي.
