۸صبح، کندهار: د وژل شوي خبریال عبدالمنان ارغند ورور صبغتالله ارغند وايي چې طالبانو یې د ورور په نوم د یوه سړک نومول شوې لیکدړه د شپې له خوا لرې کړې ده.
صبغتالله ارغند یکشنبه د تلې پر ۱۲مه ویلي چې دا سړک په مخکېني حکومت کې د «شهید عبدالمنان ارغند واټ» په نوم نومول شوی و.
د نوموړي په خبره، د دغه سړک له رغولو وروسته پرون یې بیا د ورور په نوم لیکدړه نصب کړې وه؛ خو د ښاروالۍ کارکوونکي بیګا شپه په موټر کې ورغلي او لیکدړه یې له ځان سره وړې ده.
ارغند ویلي چې که د دغې لیکدړې لګول له اصولو سره په ټکر کې و، ښاروالۍ کولای شوای ورسره اړیکه ونیسي.
عبدالمنان ارغند د ۱۳۹۷ کال په ثور میاشت کې په کندهار کې په یوه وسلهوال برید کې ووژل شو.
هغه مهال د نوموړي د وژنې تور پر طالبانو لګول شوی و.
د دغه خبریال له وژل کېدو وروسته په کندهار کې ځايي چارواکو په دغه ښار کې یو سړک د عبدالمنان ارغند په نوم ونوموه.
