۸صبح، کابل: د روسیې د بهرنیو چارو وزارت خبر ورکړی چې د افغانستان په اړه د «مسکو فارمټ» اتمه ناسته د تلې پر ۱۳مه په مسکو کې جوړېږي او د طالبانو، روسیې او سیمې هېوادونو استازي به پکې ګډون وکړي.
د روسیې د بهرنیو چارو وزارت ویاندې ماریا زاخارووا پنجشنبه د تلې پر ۹مه ویلي چې په دې ناسته کې به د روسیې، طالبانو، ایران، چین، هند، پاکستان، قزاقستان، قرغیزستان، تاجکستان او ازبکستان ځانګړي استازي او جګپوړي چارواکي برخه ولري.
نوموړې زیاته کړې چې د طالبانو د بهرنیو چارو وزیر امیرخان متقي په مشرۍ پلاوی به په دې ناسته کې ګډون او د روسیې د بهرنیو چارو وزیر سرګي لاورف به هم وینا وکړي.
ټاکل شوې چې متقي به د ناستې په څنډه کې له لاوروف سره وګوري او پر دوه اړخیزو همکاریو به خبرې وکړي.
په دې ناسته کې پر سیاسي او اقتصادي همکاریو او د ترهګرۍ او نشهيي توکو پر ضد مبارزې به هم بحث وشي او ښايي ګډ بیان هم صادر شي.
