له بګرامه وروستی امريکايي سرتېری بهر شو

امريکايي رسنيو راپور ورکړ چې د روان کال د چنګاښ په ۱۱مه، له بګرام پوځي اډې څخه د امریکايي سرتېرو وروستۍ ډله بهر شوه.
سي‌ ان ان د امريکا دفاع وزارت د چارواکو له قوله راپور ورکړی چې له افغانستانه د امريکايي پوځیانو د وتلو بهیر لا نه دی بشپړ شوی، خو په پروان ولايت کې له بګرام پوځي اډې امريکايي سرتېري ووتل. په دې توګه د بګرام پوځي اډې مسؤليت ملي دفاع وزارت ته وسپارل شو. د سي ان ان په وينا له افغانستانه د امريکايي ځواکونو د وتلو بهیر تراوسه نه دی بشپړ شوی، خو زر تر زره به دغه بهير پايته ورسېږي.
دا په داسې حال کې دي چې د سولې د خبرو بهیر ډېر ټکنی او طالبانو ډلې هم د امنيتي ځواکونو پرخلاف خپلو بريدونو ته زور ورکړی دی.
له بل پلوه، د امريکا دفاع وزير لوېډ اسټېن د چنګاښ په لسمه نېټه د افغانستان د ملي دفاع وزارت له سرپرست بسم الله محمدي سره ټيليفوني خبرې کړې دي.
په دغو خبرو کې اسټېن د طالبانو له خوا د تاوتریخوالي زیاتوالی د اندېښنې وړ او د جګړې پراختیا یې د سولې هراړخیزې هوکړې ته د رسېدو په وړاندې خنډ بللی دی. هغه زیاته کړه، په داسې حال کې چې امريکايي سرتېري له افغانستانه د وتلو په حال کې دي او دا بهیر ډېر زر پايته رسېږي، خو امريکا د افغانستان د امنيت او ثبات په برخه کې پانګونه کړې ده.
د ملي دفاع سرپرست وزیر بسم الله محمدي په دغو تلیفوني خبرو کې د افغان امنیتي ځواکونو د تمویل او سمبالولو او همداراز هوايي ځواک ته د نویو الوتکو له ورکولو مننه وکړه او له نړیوالې ترهګرۍ سره یې د مبارزې په برخه کې د دواړو هېوادونو ترمنځ د همکاریو د دوام غوښتنه وکړه.
د امریکا دفاع وزیر په افغانستان کې دایمي سولې ته د رسېدو لپاره د مذاکراتو له فرصته پر ګټې اخیسټو ټینګار کړی دی. سي ان ان له بګرام هوايي اډې څخه د امريکايي سرتېرو وتل د طالبانو ډلې لپاره يوه «نمایشي» بريا ګڼلې ده؛ دغې ډلې د افغان امنیتي ځواکونو پرخلاف پراخه جګړه پيل کړې ده. له دې وړاندې هم امريکايي چارواکو رويټرز خبري آژانس ته ويلي ؤ چې واشنګټن له افغانستانه د خپلو ځواکونو د بشپړ ایستلو په حال کې دی.
يوه لوړپوړي امريکايي چارواکي له دې وړاندې ټينګار کړی ؤ چې د امريکايي ځواکونو له بشپړ وتلو وروسته به د کابل د هوايي ډګر او امریکا د سفارت د امنیت د ساتلو په موخه شاوخوا ۶۰۰ سرتېري په کابل کې پاتې شي.